Алиментле заманында тёленирча

Россейни КъМР-де Сюд приставларыны управлениясында  болгъан тюбешиуде  ведомствону башчысыны орунбасары, КъМР-де баш сюд приставны орунбасары Эфендиланы Олег  аланы  ишлеринде бек башы акъылбалыкъ болмагъан сабийлени сейирлерин эмда праволарын къоруулау болгъанын чертип айтханды.

-Быйылгъы жылны озгъан сегиз айыны ичинде  сюд приставла алиментлерин тёлемеген  602 адамны  ырысхысын сыйыргъандыла,  алимент борчлу болгъан 2672 гражданиннге  республикадан тышына чыкъмазча  бегим  къабыл этилгенди, 1124 инсандан машина жюрютюрге  эркинликлери сыйырылгъанды,-деп билдиргенди  Эфенди улу. Дагъыда ол билдиргеннге кёре, башда айтылгъан ахыр амал бютюн хайырлы  болгъанын кёргюзтгенди – аны бла байламлы 15 миллион сом  тёленнгенди.

Баш сюд приставны орунбасары айтханнга кёре, январьдан бери  борчлары болгъан 576 адамгъа  административ жууапха тартыу жаны бла  протокол жарашдырылгъанды. Алиментлерин заманында тёлемегенлеге  125  уголовный иш ачылгъанды, озгъан жылны ол кезиую бла тенглешдиргенде, 106 бола эдиле.

Бусагъатда республикада алиментлерин тёлеуден албугъартып айланнган 2000- ден аслам гражданин бардыла, аланы битеу да тёлерик ахчалары 400 миллион сомгъа жетеди. «Аланы иги кесеги бир жерде да ишлемегенледиле, болсада аны ючюн алиментлерин тёлеуден къутулаллыкъ тюйюлдюле»,- деп чертгенди Эфенди улу.

КъМР-ни Сюд приставларыны управлениясы Ишге тохташдырыуну арасы бла бирге борчлары болгъанланы ишге салыу жумушну да тамамлайды. Аны бла да къалмай, алиментлерин заманында тёлегенлерине да къаты  контроль этеди. Бухгалтерияла алиментлени  къалай тыйгъанлары да тинтиледи. 2019 жылны ичинде 700-ге жууукъ тинтиу бардырылгъанды. Хар замандача, бек кёп борчлары болгъанла Прохладна шахарда бла районда жашайдыла. Анда алагъа 820 толтуруучу производство ачылгъанды, Нальчикде уа -799.

Ол жаны бла Элбрус, Черек районлада хал игиди. Алада алиментлени кёпле сюдню сакъламай тёлейдиле. Борчлу болгъан адамла уа тюрлю-тюрлю жыл сандадыла. Аланы араларында 44- жыллыкъла, пенсиячыла, жарсыугъа, тиширыула  да бардыла. 

Эфенди улу айтханнга кёре, борчлу болгъанланы административ жууапха тартхандан сора ,  асламысы  акъылларын башларына жыйып, борчларын заманында тёлейдиле. Болум тап халда болур ючюн, сюд приставла дайым да рейдле бардырадыла.
Тюбешиуню ахырында  Олег Аркадьевич  журналистлени сорууларына да  тынгылы жууапла бергенди.

Марзият Адилова.
Поделиться: