Минги тау бла шагъырейленедиле

Актёр эм поэт Владимир Высоцкийни туугъан кюнюде Уралда алыкъа жамауатха кёргюзтюлмеген суратланы кёрмючю болгъанды.

Анга сурат алыучу Владимир Федосов Минги тауну тийрелеринде алгъан 53 сурат киредиле. Алада 32-жыллыкъ Высоцкийни тенглерини, альпинистлени биргелерине кёребиз. Ала суратха тюшебиз деп бирге тизилмегендиле, Владимир Федосов аланы камерагъа ушакъ эте, кюле-ышара, бара тургъанлай алгъанды. Суратланы Владимир Высоцкийни музейине уа предприниматель, аны чыгъармачылыгъын бек сюйген Андрей Симановский бергенди. Ол кеси заманында аланы «Екатерининская ассамблея» аукционда тёрт миллионнга алгъан эди.

Белгилисича, поэт эм жырчы Элбрусда кёп кере болгъанды, ол санда «Вертикаль» фильмни алдыргъанларында да. Анда ойнар ючюн, ол къаялагъа ёрлерге юйреннгенди, андан сора уа, тауланы сюйюп, башха бийикликлени да кёрюрге итиннгенди. Таулада ол кесин сынагъанды, илхам да тапханды.