«Ата журтума хайыр келтирирге сюеме"

Мектепни айырмалы бошап, ара шахарыбызда вузлагъа кирип, аланы да жетишимли тауусхан жаш адамларыбыз аз тюйюлдюле. Ала тутхан ишлеринде атларын айтдыра, миллетге да махтау келтиредиле. Теммоланы Фатима да аланы санындады. Ол Москваны Авиация институтуну Ракеталаны эм ракета-космос комплекслени проектированиясы, чыгъарыу эм хайырланыу бёлюмюн бошап, бюгюнлюкде анда ишлейди.

Фатима Теммоланы Мурадинни бла Ахматланы Светлананы юйюрлеринде туугъанды.   Нальчикни экинчи номерли лицейин тауусханды, анда алгъа физика-математика, ызы бла уа инженер-технология классда окъугъанды. Гитчеликден да туура илмулагъа сейири болгъанды, математика бла физиканы къачан да сюйгенди, гуманитар жаны, тилле уа къыйыныракъ берилгендиле. Бийик усталыкъ билим алыргъа заман жетгенде, жюреги неге тартханына, атасы бла анасы айтханларына да тынгылап, Москваны Авиация институтун сайлагъанды.

- Гитче заманымда Юрий Гагаринни бла Нил Армстронгну жигитликлерини юсюнден окъуй, космосну кёрюрге, аны юсюнден кёбюрек билирге умут этген эдим. Сабийликде муратым кесими кемеми ишлеп, кёкге учаргъа эди. Сёзсюз, бизни къыралыбыз космосну таныуда уллу къошумчулукъ этгенди, алай, аны бла бирге, дунияны тинтиуде башха къыралланы къыйынларын да эниш этерге жарамайды. Биз бюгюнлюкде жулдузланы, аламланы, кёкню юсюнден билгенибиз – дуния сообществону жетишимиди, барыбызны да бирге къыйыныбызды, - дейди ол.

Диплом ишине уа Фатима «Учуу аппаратны хауасын углекислый газдан мембрана технологияны болушлукълары бла тазалау» деген теманы сайлагъанды, анда космос станцияда атмосфера сууну конденсантын тазалау эм системагъа жангы агрегатны жарашдырыуну юсюнден айтылады. Аны къоруулагъанлай, аспирантурагъа да киргенди. Москвада къалып, тутхан ишинде жетишимле болдура, Ата журтуна хайыр келтирирге сюеди.

Бюгюнлюкде ол окъугъан институтунда преподавательди, студентлеге жашау циклны управлениясын автоматизациялау жаны бла дерсле береди. Институтда къалгъанын жашауунда эм тюз оноугъа санайды. Анда кесин тюз да юйдеча сезеди, ишин сюеди, жюреги да тынчды, сора вуз кюн сайын берген онгла ючюн анга бек ыразыды. «Мында къалгъанымы дагъыда бир сылтауу – аны юсюнден кеслери да тилеген эдиле, эштада, ала да менде бир хунер кёрген болурла. Иш неда ырахатлыкъ, зауукълукъ, неда ахча келтирирге керекди дейдиле. Ол жаны бла насыбым тутханды», - дейди.

 «Кесини бир мураты болгъан, жашаууна саулай неда аны бир кесегине бу затха жетиширге керекме деп борч салгъан инсан, аны толтурур ючюн кючюн, билимин, заманын да аямай кюреширге керекди. Манга дайым айныгъан, жангы билим, сынам алгъан бек магъаналыды, ингилиз тилни окъуй турама, аны да мыйыны ишлетир, жангы затны юсюнден сагъыш этер ючюн», - деп ойлайды ушакъ нёгерибиз. Аны бла бирге хар кимни да къаллай бир эсе да бир даражагъа жетмей амалы жокъду демекликни уа тюзге санамайды, адам насыпны башха жаны бла да табаргъа боллукъду, аллайлагъа терссиз дерге жарамаз, деп чертеди.

- Инсанны бек уллу байлыгъы, насыбы да тёгерегинде адамларында, жууукъларындады, - деп белгилейди Фатима. - Нёгерлерим бла къысха, алай зауукълу тюбешиуле жюрегими учундурадыла. Шуёхла – ол инсанны кеси сайлагъан юйюрюдю деп, сёз барды. Бирге окъугъан тенглерими, ишчи нёгерлерими жюрекден сюеме. Аланы хар бири да энчи бир дуниячадыла, керек жерде кёл этдирлик, ажашханда уа, тюз жолну кёргюзтюрюк адамларымдыла. Шуёхларым болгъаны ючюн кесими насыплыгъа санайма.     Ишимде уа студентлерим иги окъусала, экзаменледе соруулагъа арсарсыз жууап берселе къууандырады. Бир затны билмеген айып тюйюлдю, алай окъургъа, билирге итинмеу – олду айып, аны ангыласа, жашауларында керекли жорукъладан бирине санасала сюеме. Дагъыда бир зат къошаргъа излейме: инсан жер башында насыплы жашаргъа, кесинден сора не къадар аз заран къояргъа итинирге керекди.