Тереклени бла юлкюлени бутакъларын кесиу

Быйыл Къабарты-Малкъарны тийресинде къыш хазна сууукъ болмагъанды, къар да артыкъ жаууп къыйнамагъанды. Аны себепли тереклеге эмда юлкюлеге хата жетмегенди. Тергеулеге кёре,  кюнню халы былай сау февральны турлукъду, аны ючюн бутакъланы кесип къысхартыргъа да себеплик этерикди.

Аланы бир-бирлерин а шёндюледе окъуна кесерге жарайды, дейдиле Россельхозараны Къабарты-Малкъарда бёлюмюню специалистлери. Сёз ючюн, эрикни, баллини, алычаны, сора дагъыда уллу тереклени бутакъларын январьда эм февральда къыркъадыла. Жаш терекчиклеге уа шёндю тиерге жарамайды, аланы кезиую къыш бошала тургъанда, хауаны орта температурасы 0 градусдан ёрге атласа жетеди.

Баш жорукъ – бутакъланы терек «уяннгынчы» кесерге керекди. Аны кесини да талай тюрлюсю барды. Бирин этгенде, терекни неда юлкюню формасын къурайдыла, башхасында уа,  артыкъ ёсген неда эски бутакъларын кетередиле.

Бу ишде жютю эмда таза бычхы бла къыпты керекди. Бутакъланы къышда кесиуню, жаз башында неда кюзде ишледен башхалыгъы жокъду. Биринчиден, терекни иги тинтип, къургъакъ, эски, жаралы эмда бошуна ёсген бутакъларын кетередиле. Ишни аны тюп жанындан башлайдыла, ызы бла ич жанына бурулгъан, къалын ёсген, бир-бирлерине тийген бутакъчыкъланы кеседиле. Эскирек бутакъланы ючден бирине къысхартадыла, уллуларын а талай къышны кезиуюнде аз-аздан кесип кетередиле, ол жерлеге уа акъ бояу неда жау маталлы абери жагъадыла.

Юлкюлени да эски эм къургъакъ бутакъларын кетериучюдюле. Барын да тамырына дери кесип къояргъа жарамайды: быйыл тёртден бирин кетеригиз, келир жыл да аллай бирин. Къышда бактерияла бла вирусла тирилмегенликге, бутакъланы кесген жерлеге энчи паста жагъаргъа керекди.

Бу ишни къышда этгенден кёп жаны бла хайыры барды: терек шёндю «жукълапды», вирусланы бла бактерияланы да кючлери жокъду. Алай дагъыда бек сууукъда аны этерге жарамайды; хауаны температурасы -5 -7 градусдан жылы тюйюл эсе, тереклеге тиерге керекмейди.