Къонакъланы сейирлерин къозгъагъандыла

Къабарты -Малкъар къырал заповедник жангы жылда ишин Ата журтубузну ара шахарында Москвада ВДНХ-да «Россей» деген кермючге къатышыудан башлагъанды. Къуру Россейде угъай, саулай Европада да, бийик тау заповедник бизни республикадан сора бир жерде да жокъду.

Россейни Экология эм табийгъат байлыкъла министерствосуну павильонунда заповедниклени кюнлери бардырылгъан эди. Шимал Кавказны энчи сакъланнган жерлерине жораланнган  ишлеге москвачыла эм къонакъла да сюйюп къарагъандыла.

Шимал Кавказны кюнлерине аталгъан иш амалларына Къабарты-Малкъар къырал заповедникни ишчилери келген къонакъланы сейирсиндирирча къурагъан эдиле кеслерини ишлерин.

- Сау кюнню «Заповедный кинотеатрны» къараучулары республикабызны  табийгъатыны сейирлик жерлери бла танышхандыла. Андан сора да, Шимал Кавказны тарых-маданият  адетлери бла шагъырейленнгендиле эм да мастер-класслагъа, соруу-жууап  конкурслагъа да кермючге къараргъа келгенле тири къатышхандыла, - деп билдиргенди бизге Къабарты-Малкъар къырал заповедникни бёлюмюню методисти Жеккеланы  Фатима.

Таппасханланы Аминат.
Поделиться: