Кёрмючге къараргъа чакъырадыла

«Россия» атлы кёрмюч-форумда «Илмуну эмда технологияланы онжыллыгъы» деген экспозиция РФ-ни Жарыкъландырыу министерствосуну башламчылыгъы бла къуралгъанды эмда ведомство анга  сейирлери болгъанланы ВДНХ-ны «Жарыкъландырыу» бёлюмюне чакъырады. Анда айтхылыкъ орус эмда совет алимлени, ата журтлу илмуну сейир тарых шартларыны юслеринден билдириуле боллукъдула. Андан сора да, бюгюнлюкде тинтиу ишлени бардырып, кёп соруугъа жууапланы излегенле бла  шагъырейленирча онг барды.

Кёрмючню залларында жаланда  экспонатланы кёрюп къоймай, аслам затха тюшюндюрген сейир видеолагъа къараргъа, керти илму  лабораторияла къалай ишлегенлерин сезерге да боллукъду. Андан тышында да, сейирлери болгъанла, тюрлю-тюрлю   илму магъаналы соруулагъа жууапла берип, кеслерини ангылауларын сынаргъа да онг табарыкъдыла. Ол а бери келгенлени билимлерин баямлагъан экзамен тюйюлдю, жаланда алагъа илмуну къайсы  ызын сайларгъа болушлукъ этиудю.

Илму-ол цивилизацияны айныууну тутхучлу мурдоруду. Аны бюгюнлюкде баш мураты  уа адамланы жашауларын игилендириудю. Аны бла бирге уа,  къыралны бла жамауатны алларында болгъан борчланы чырмаусуз тамамлауду. Аны себепли уа, бу кёрмючде болгъанла алимлени бюгюнлюкде бардыргъан ишлерин кёргенлеринден сора  да, кеслери да къыралда илмуну айныууна къошумчулукъ этгенледен бирлери болурча,  ала да ол жолну сайларгъа кёлленирча  мадарла этилликдиле.

«Илмуну бла технологияланы онжыллыгъы» деген кёрмюч экскурсия халда къуралгъанды эмда аны кёрюр ючюн хакъ тёлерге керек боллукъ тюйюлдю. Эсгерте кетейик,  экспозиция былтыр ноябрьде ачылгъанды эмда ары быйыл апрельге дери барыргъа боллукъду. Кюн сайын а илму кёрмючге юч минг чакълы адам къарайды. Сагъынылгъан экспозиция «Россия» Халкъла аралы кёрмюч-форумну чеклеринде къуралгъанды, ол а (форум) озгъан жылда тамамланылгъан эм магъаналы жетишимледен  бирине саналады.

Трамланы Зухура.
Поделиться: