«Журналист къараучуну кесини ызындан сайлама сейир жолла бла элте билирге керекди»

Бир ненча жылны ичинде республикада «Алтын нал» деген телевидение-информация бериулени фестивалы бардылып тургъанды. Анга  багъа берирге, барыу халына къараргъа, республикагъа кёп белгили репортёрла келиучю эдиле. Аладан бири аны председатели   ВГТРК-ны жамауат-политика бёлюмюню энчи корреспонденти Александр Сладков болгъанды. Аны республикагъа келгенин хайырланып, бизни репортёрларыбызны, аланы ишлерини, дагъыда  башха затланы юсюнден ушакъ  этген эдик.

-Журналистлени араларында фестивальла, конкурсла, тюбешиуле  керекмидиле?

-Бек керекдиле. Къаллай тюбешиуле, жыйылыула, фестивальла да мени  акъылыма кёре,  бек иги ишди.  Алада эрттеден бери да кёрмей тургъан шуёхларынгы, танышларынгы  кёресе, тюбешесе, арт заманлада болгъан жангылыкъла  бла шагъырейленесе.

-Бу жолгъа дери Нальчикде уа болгъанмысыз?

- Къабарты-Малкъар,  саулай Кавказ да  бек къонакъбайлы жерди. Аны себепли мында оюмунгу айтыр ючюн, кёп хазырлана турур кереклиси жокъду. Бир бирни  терк ангылайбыз, иги таныйбыз. Нальчикге биринчи кере къышда  келген эдим. Бу кюнледе уа кёрдюм къаллай ариу, таза шахарды. Кюн да иги, жылы. Къайры барсанг да  къонакъбайлыкъ –  жюрегинги, ариулукъ  кёзюнгю къууандырадыла. Адамла да огъурлула. Мамырлы жер.

-Бизни журналистлерибиз бла тюбешип, ушакъ да этгенсиз, аланы ишлерине да эс бургъансыз. Сюжетлерини юсюнден не айтырыкъсыз?

- Сёзсюз, бек уллу эс буруп къарагъанма, бек бийик качестволу ишледиле. Ким биледи, мени оюмум бла келишмей, даулашырыкъла да болурла, алай дагъыда къайтарып айтама, кеси оюмуму билдирирге, къорууларгъа хазырма. Мында журналистле Гран-при  саугъагъа тийишли болургъа боллукъ материалланы хазырлагъанларын шарт айтыргъа керекди.  

Аланы  ишлери бек сейирликдиле, кючлюдюле, кеслерини халаллыкълары, кёзбаусузлукълары, жюреклени къозгъаулары бла да айырмалыдыла. Сабийле, къартла бла байламлы кёп иги сюжетле бардыла. Сёз ючюн,  миллетле аралы болумну юсюнден аслам ахшы ишни кёргенме.

-Телевиденияда ишлеген журналистлени усталыкълары, сюжет сайлай билиулери  ёсгенмиди?

-Сёзсюз. Адамла, сюжетни жарашдырып, ариу алыргъа, компьютер графика этерге да боллугъун ангылайдыла. Алай кадрда ишлерге сюйгенле уа аз болгъанлары осалды.

Хау, бек  фахмулула да  бардыла, ала Федерал телевиденияда ишлегенледен артха къаллыкъ тюйюлдюле. Адам сёлеше, кесин жюрюте билирге керекди кадрда. Алгъыннгы фестивальлагъа келтирилген ишлени юсюнден айтханда уа, бу жолгъула кючлюрекдиле дерге боллукъду. Проектге  къатышханланы усталыкълары, сёзсюз, ёсгенди.

-Мында кёрген техниканы, журналистлерибизни да юслеринден айтсагъыз эди.

- Заманнга кёре айный баргъан ишде алгъа чыгъады.  Мында усталыкъны ёсдюрюу процесс барады. Сюжетни ким алгъа хазырласа, ол алгъа чыгъады.  Болсада фестивальда энчи къадарлы сейир  жигитлери болгъан  сюжетлени кёргюзтюу изленеди, хорлагъан да ала этедиле.

Андан сора да, къаллай иш да къууанч келтирирге керекди. Сёзсюз, репортёр, оператор, звукооператор, дагъыда кёп башхала бла да тийишли уруна билирге керекдиле.   Бизде уа къалай болады? Машина жокъ, иш хакъынг хазна тюйюл… Къалай-алай болса да, битеу ол затланы эсге алмай, кесинге, санга къарагъанлагъа да къууанч келтирирча кюреше билген махтаулу шартды.

Бизни жумушубузда хар не гитче затны да магъанасы уллуду. Сёз ючюн, санга къарагъанла  ауузларын ачып уллу сейирге къалырча ишинги  алай тынгылы этерге керексе. Асламында  къараучу  журналистге энчи жигитлени табып, аланы ич дунияларын ачыкълай билиуюне кёре багъа береди. Ол а, жарсыугъа, кёплени къарыусуз жерлериди. Журналист къараучуну кесини ызындан  сайлама  сейир жолла бла элте билирге керекди.

-Журналист ишни юсюнден а не айтыргъа боллукъсуз?

- Ала бусагъатда къыйын болумлада ишлейдиле. Федеральныйле, сёз ючюн, айтхан затларына хар заманда да жууаплы  болмайдыла. Мында, Къабарты-Малкъарда, жер-жерледе, муниципалитетледе да болум экилиди. Басма-информация органлада уруннган бир кере алдаса, экинчи анга ийнаныу боллукъ тюйюлдю. Дагъыда регионлада азат оюмлу журналистге хазна онг чыкъмаз деригим келеди.