Тазалыкъ ахшы экологияны баш жоругъу

«РусГидро» компанияны Къабарты-Малкъарда бёлюмюню башламчылыгъы бла алгъаракъда Нальчикде «оБЕРЕГАй» деген кезиулю экология акция ётгенди. Анга Нартан элни бешинчи номерли школ-интернатыны окъуучулары да къатышхандыла. Бу ишни баш магъанасы суу къолайлыкъны сакъларгъа кереклисине жамауатны эсин бурургъады, ёсе келген тёлюню да табийгъат байлыкълагъа аяулу кёзден къараргъа юйретиргеди, деп билдиргендиле компанияны пресс-службасындан.

Алай бла окъуу учрежденияны жарым жюзден аслам келечиси эмда компанияны бир ненча специалисти ол кюн Нальчик сууну жагъасыны бир кесегин  кир-кипчикден тазаларгъа чыкъгъандыла. Ишни башлардан алгъа бёлюмню келечилери акциягъа къатышханланы барына да «оБЕРЕГАй!» деген белгиси бла юс кийимле юлешгендиле эмда керекли затла бла жалчытхандыла.

Бу ишге къатышхан сабийле, таматала да эки сагъатны ичинде 120 машок кир-кипчик жыйып, белгиленнген жерни толусунлай тазалагъандыла. Школчула уа иш къалай баргъанын, бир-бирлерин да суратха алып, аланы интернетде акцияны http://oberegai.rushydro.ru/ сайтына эмда ВКонтакте, Фейсбук эм Инстаграм социал сетьлеге салгъандыла. Алада уа «Айырмалы команда», «Табийгъатны эм ариу жери» эмда «Селфи-оБЕРЕГАй» деген номинациялада сайлау бардырылады. Конкурсну эсеплери быйылны ахырында чыгъарыллыкъдыла, хорлагъанлагъа уа «РусГидро» компанияны атындан сыйлы саугъала берилликдиле.

Компания бу акцияны саулай къыралда жыл сайын бардырады. Ол кеси да жаш тёлюню тёгерекдеги къудуретге сакъ болургъа, экологиягъа аяулу кёзден къараргъа юйретир умут бла къуралгъанды. Анга 2005 жылдан бери 40 минг сабий, волонтёрла, жамауат организацияланы эмда муниципалитетлени келечилери къатышхандыла, жыйылгъан кир-кипчикни ауурлугъу уа эки минг тоннадан артыкъ болгъанды.

Улбашланы Мурат.
Поделиться: