Жаш предпринимательлеге къошулурча

Кёп болмай «Иш кёллю Россей» жамауат организацияны Къабарты-Малкъарда бёлюмюню толтуруучу таматасыны орунбасары Таумурзаланы Салидат КъМР-ни цифралы айныу министри Бёзюланы Аскер бла тюбешгенди. 

Аны чеклеринде эки жаны да министерство бла бизнес-биригиую байламлыкъда ишлерча онгланы сюзгендиле. Ол санда бизнесге IT-технологияла жаны бла болушлукъ тапдырырча, сынау халда IT-башламчылыкълагъа грантла берилирча, бирге социал проектлеге къатышырча эм башха соруулагъа къаралгъанды.

Делороссла министерство бардыргъан форумлагъа спикерлени орунларына къатышыргъа боллукъларын айтхандыла. Ведомствода да быйыл Нальчикде ётерик алтынчы Жаш тёлю бизнес-школну чеклеринде цифралы къоркъуусузлукъну юсюнден семинарла бардырыргъа хазырлыкъларын   билдиргендиле. Андан сора да, предпринимательство бла танг кесек байламлы соруулагъа къарагъанды. Ол санда электрон халда тёлеуле бардырырча онглагъа да энчи эс бурулгъанды.

 Ызы бла Таумурзаланы Салидат КъМР-ни жаш тёлю арасыны таматасы Ляна Тлимахова бла да тюбеп байламлыкъда ишлеуню къыйматлыгъын билдиргенди. Мында жаш тёлюню башламчылыкъларында тутхучлукъ этилирге кереклиси айтылгъанды.  Ол санда «Иш кёллю Россейни» жаш тёлю бёлюмю ишин айнытырча, «Жаш тёлю бизнес-школа» проектни   бардырырча, дизайнерлени конкурсун ётдюрюрча эм башха къыйматлы проектле белгиленнгендиле. Жууукъ заманда белгили спикерле да къатышып Жаш тёлю арада курсла бардырыргъа келишгендиле.   

Ахырында Салидат Мухарбиевна КъМР-ни жаш тёлюню ишлери жаны бла министрине Азамат Люевге «Деловая высота 2023» премияны бардырыргъа ведомство ахшы къошумчулукъ этгенине ыразылыгъын билдиргенди.

Курданланы Сулейман.
Поделиться: