«Бизнесге онг бериу – олду баш борчубуз»

Къабарты-Малкъарны Сатыу-алыу – промышленность палатасында (ТПП) республиканы власть органларыны келечилери эмда предпринимательле бла тюбешиу болгъанды.

Палатаны башчысы Хасан Гукетлов биринчиден бу биригиуню былтыргъы ишини юсюнден хапарлагъанды. Ала бизнесге эмда предпринимательствогъа, аны юсю бла уа республиканы экономикасына да себеплик этгенлерин чертгенди. Баш борч – предпринимательство бла кюреширге женгил онгла болурча этиудю. Аны ючюн а къырал власть органла, бизнес биригиуле, сейирлери болгъан хар кимле да бирге ишлерге керекдиле. Ол жаны бла уа, Гукетлов билдиргеннге кёре, жарсырча тюйюлдю: регионну властьлары ТПП бла байламлыкъ жюрютедиле, ол кеси да КъМР-ни Башчысында, УФАС-да, Прокуратурада эмда предпринимательлени эркинликлерин къоруулау жаны бла Уполномоченныйде Советлеге киреди. Министерствола бла да иш алайды, деп, ол бегирекда уллу магъана Экономиканы айнытыу министерствосуна бергенди.

Аланы бары бла да бирге къармашып, бизнесге форумла, «тёгерек столла», форумла бардырыладыла. Ол жаны бла иги себеплик этип тургъанлары ючюн, экономиканы айнытыу министрге  Рахайланы Борисге эмда аны орунбасарына- Темиркан Баждуговха Россейни Сатыу-алыу – промышленность палатасыны атындан Ыразылыкъ письмола бергендиле. Аллай сыйлы къагъытха сатыу-алыу, жамауатха аш этиу эмда потребкооперация бёлюмледе уруннганланы эм предпринимательлени профсоюзуну КъМР-де бёлюмюню башчысы Марита Бекалдиева эмда Хасан Гукетлов кеси да тийишли болгъандыла. КъМР-де ТПП-ны грамоталары бла да талай предпринимательни саугъалагъандыла.