Налогну юсюнден билдириуле

Федерал налог службаны Къабарты-Малкъарда управлениясындан билдиргенлерича, энди налогла жаны бла тазирлени, къошакъ тёлеулени, процентлени юслеринден СМС  неда электрон почта бла билирге боллукъду. РФ-ни Налог кодексини 31 статьясыны жетинчи кесегинде жазылгъан жорукъ кюч алгъаны бла, налог органла аллай информацияны адамлагъа  СМС  неда электрон почта бла жиберирге эркинлик алгъандыла. Ведомствода ышандыргъанларына кёре, инсанланы ол жаны бла безиретирик тюйюлдюле, нек дегенде, законда айтылгъаныча, быллай билдириулени кварталгъа бир кереден кёп жиберирге жарамайды.

Алай бла, бу жумушха къатышыргъа сюйгенле налог органнга къол бла жазып (КНД – 1160068 формада),  заявление берирге керекдиле. Ведомствону адреси: Нальчик, Ленин атлы проспект, 31. Сюйсегиз а, аны сайтха кирип, «Энчи кабинетде» ашырыргъа боллукъду.

Улбашланы Мурат.
Поделиться: