Къатхан эрикни хайыры

Тарыхда жазылгъаннга кёре, эрикни кюн тюбюнде къатдырып биринчи кере буруннгулу египетлиле башлагъандыла. Бу амал ызы бла Африкагъа эмда башха жерлеге да жетгенди. Аны эт эмда кёгет ашлагъа къошуп болгъандыла, алайлай ашагъанда стрессден, къарыусузлукъдан болушханын да тохташдыргъандыла.

Къатхан эрик аш оруннга, чегилеге да хайырлыды, адамны ичи къатса, бек болушады кеси да. Анда калий кёп болгъаны себепли жюрек-тамыр системаны иги ишлетеди, тамырланы кючлендиреди, къанны басымын мардасына келтиреди. Витамин С иммунитетни кючлю этеди, ауруулагъа хорлатмазгъа болушады. Сюекле къаты болуруна кальций эмда К витамини себеплик этедиле, В къауумгъа кирген витаминлери, магний эмда темир деген минераллары уа адамгъа кюч-къарыу бередиле. Быллай эрик нерва системаны тап халгъа келтиреди, адамны жукъусун да иги этеди.

Неге жарамайды

  • Къатхан эрикде кёп бал тузу барды, аны ючюн аны артыгъы бла ашаргъа керекмейди, диабетден къыйналгъанла, семизле уа бютюнда.
  • Сабийге ёшюн берген тиширыула да сакъ болсунла: ала аны ашасала, къагъанакъны къарынчыгъы кёберге боллукъду.
  • Быллай эрикни мардасындан артыкъ ашагъанлада аш орунларында эмда чегилеринде эски ауруулары къозгъалыргъа боллукъдула.

Бир кюннге къаллай бир ашаргъа жарайды?

Аны мардасы адамны халине, саулугъуна кёреди, алай кюннге 5-6 эрикден кёп ашамазгъа керекди. Оздурмаса - андан къоркъуу боллукъ тюйюлдю. Алай саулукъда кемчиликле бар эселе уа, врач неда диетолог бла оноулашыргъа керекди.

Къайсысы игиди

Къатхан эрикни кёп тюрлюсю болуучуду. Бирлери татлыдыла, башхалары уа ачыракъ болуучудула. Къайсысы да жумушакъ, аз суулу, юсю уа къап-къара, кеси да аз-маз жау бетли болургъа тийишлиди. Эзилген, мугут неда чириген жерлери болгъанланы уа алмагъыз. Тапсыз жарашдырылгъан эрикле битеу хайырлы затларын, витаминлерин бла минералларын да тас этедиле.

Бу затны башы гам жабылгъан оруннга къуюп, холодильникде тутса игиди. Алай аны унутуп а къоймагъыз, алты айдан оздурмагъыз заманын. Игиси – кёпге соза да турмай, ашап къойсагъыз.

Улбашланы Мурат.
Поделиться: