Эски юйле жангыртыладыла

Къабарты-Малкъарны кёп фатарлы юйлеге тынгылы ремонт этиу Фонду тийишли республикалы программаны тамамлау бла кюрешеди. Былтыр аны чеклеринде 91 юй жангыртылгъанды, жарым жюзден артыкъ эски лифтни орунуна жангылары орнатылгъандыла. Экинчи жумушну тындырыргъа себепликге ахча регионну бюджетинден да берилген эди.

Фонддан билдиргенлерине кёре, бюгюнлюкде фатарланы иелеринден тёлеулени жыйыу 109 процент болады. Башхача айтханда, кезиулю ахча бла бирге алгъын жылладан къалгъан борчланы бир кесеги да тёленнгенди. Аны хайырындан юйлени ичлеринде суу эмда канализация быргъыла, электрокюч бла жалчытыу системала, жашау журтланы башлары, тышлары, лифтлери да жангыртыла барадыла. Былтыр барындан да бек Нальчикде эмда Тырныауузда аслам мадар этилгенди.

Эсигизге салайыкъ: регионлада кёп фатарлы юйлеге тынгылы ремонт этиу система Россейде 2014 жылда ишлеп башлагъанды. Бюгюнлюкде жашау журт фондну жангыртыу жаны бла ол эм магъаналыгъа саналады, ары дери быллай иш бир кере да бардырылмагъанды. Проектни хайырындан юйле къоркъуусузлу боллукъдула, ала азыракъ тозурарыкъдыла, эски юйлени саны уа азая барлыкъды.

Хурметли жамауат! Фонду ишини неда сизни анда энчи счётугъузну юсю бла сорууугъуз бар эсе 8-800-700-64-12 эм 42-56-29 номерле бла сёлешигиз неда regoperator.07@mail.ru электрон почтагъа жазыгъыз. Аны адреси: Нальчик, Горький атлы орам, 17А.

Жангы информация бла шагъырейленирге сюе эсегиз а, регион операторну ма бу телеграм-каналына жазылыгъыз: https://t.me/kapremont07.