Жашил чайны хайырлылыгъы

Бизни къыралны адамлары къара чайны кёбюрек ичгенликге, специалистлени оюмларына кёре, андан эсе, жашил чай игида хайырлыды. Аны чыгъарыуну технологиясы аны ариу ийисин эм витаминлерин сакъларгъа онг береди.

Авитаминоз, башхача айтханда  витаминлени азайыулары,  артыкъ къоркъуулу тюйюлдю. «С» витамин кёк чайда  къара чайдагъындан эсе  он кереге кёпдю. «Р» витаминни (ол къан тамырланы къабыргъаларын бегейтеди) ёлчемине кёре уа, кёк чай чемпионланы араларындады. Бу эки витамин бирикселе уа, «В» витаминлени комплекслери нерва системаны ишлеуюн, терини халын, веществоланы алышыныуларын игилендиреди.

Алимлени айтыуларына кёре, жашил чай адамны чархына иги жарайды эм  ёмюрюн узакъ этерге да себеплиги барды.

Кёк чайны катехинлери, эркин радикаллагъа къажау кюреше, адамны чархыны къартайыуун да акъырынландырадыла, рак ауруудан къоруулайдыла. Бу чайны тинтиу ишле Японияда тынгылы бардырыладыла. Ракны тинтиую бла кюрешген араны специалистлери айтханнга кёре, ол чай артыкъ ауурлукълары болгъан адамлагъа да иги болушады, аны дайым ичип тургъан адамлада кёпчюуле аз чыгъадыла.

Жашил чайны мардасы бла ичгенни артыкъ ауурлукъгъа саналгъан килограммлары да  кетедиле.  Ол чайда болгъан къыйматлы затла ашны эриуюне себеплик этедиле, аш орун чегини ишлеуюн тирилендиреди, алай бла уа артыкъ ауурлукъгъа къажау кюрешни къыйматын кётюреди.

Орта Азияда семиз этден жарашдырылгъан азыкъны ашагъандан сора кёк чайны ичиу тёре эрттеден бери барады. Ол аш орунну къыйнамазгъа болушады. Кёк чайны пектинлери семиз этни эриуюне ахшы себеплик этедиле, адамда артыкъ ауурлукъну кетередиле, къанда холестеринни азайтадыла, атеросклероз аурууну чыгъыуун артха созадыла.

Андан сора да, чай ичиу адамны ичинде болгъан бактерияланы жайылыуун тохтатыргъа аламат амалды. Дагъыда жашил чай ашарыкъладан ууланыудан къутултургъа да ахшы себеплик этеди, чегилеге тюшген инфекцияны да тынч кетереди. Туркменияны алимлери 50-чи жыллада окъуна тохташдыргъанларыча, бактериялагъа къажау кюрешде жашил чай бирси чайланы барысындан эсе да  къыйматлыды.

Жашил чай адамны чархын ариуларгъа болушады, аш орунну эм чегилени заранлы затладан тазаларгъа иги себеплик береди, адамны къуугъун мардасы бла ишлетирге, жюрюуюн терклендирирге, алай бла уа бюйрекледен токсинлени эм тузланы кетерирге да жарайды. Кёк чайны хайырындан заранлы затла адамны чархындан терлеу бла да кетедиле. Андан сора уа адамны юсюнде иничке тешикчикле ариуланадыла, терини солууу игиленеди, адамны бети, халы жарыкъ болады.

Харкюнлюк жашауубузда бизни саулугъубузгъа кёп тюрлю затла заран келтиредиле – кюнню исси тийгенинден башлап, телевизорла, компьютерле эм жашауда хайырланылгъан техника бла бошап. Аладан чыкъгъан электромагнит толкъунла барысы да бузадыла бизни саулугъубузну. Кёк чай ол тюрлю хаталы затлагъа къажау кюрешде бизге бек иги болушады, ол ичибизге кирген заранлы затланы чархыбыздан жуууп чыгъарыргъа болушады.

Сагъынылгъан чай мыйыбызны къан тамырларын кенгертеди, алада къанны жюрюуюн тынч этеди. Аны бла бирге уа, кёк чайны нерва, солуу, жюрек-къан тамырла системалагъа ишлерге уллу себеплик береди, алай бла уа адамны битеулю халы, ишлеу онглары кючленедиле.

Жашил чайны жарашдыра туруп, ууакъ-тюек затланы да эсге алыргъа керекди. Суу осал эсе, не бек иги чайны да бузады. Чайгъа керекли суу «жумушакъ» болургъа керекди. Аллай иги сууну шешалагъа къуюлгъанын

сатып аладыла. Сюзгючледен ётдюрюлген суу да болады таза эм жумушакъ. Чайгъа хайырланыллыкъ сууну экинчи кере къайнатыргъа жарамайды – чайны татыуу бузулады.

Кёк чайны кырдыгын гитче чайникде кёп заманны ичинде жибитирге керек тюйюлдю-витаминле тас боладыла. Къытайлыла кырдыкны энчи табакъчыкъгъа салып, юсюне къайнар сууну къуядыла, башын тылпыу чыкъмазча жабадыла. Бир неда андан кёп къашыкъ чай кырдыкны пиалагъа неда стаканнга атып, аны юсюне къайнагъаны шошайгъан сууну, адырны иги ёрге толтурмай, къуядыла, ол эки юч минутну турургъа къоядыла.

Биринчи  кере ичгенден сора чайны, заварканы тёкмейдиле, аны кюнню ичинде дагъыда эки-юч кере хайырланадыла - кырдык бютюнда хайырлы болады. Биринчи чайны ийиси кючлюрекди, заварканы юсюне суу экинчи, ючюнчю кере къуюлгъанда татыуу иги чыгъады.

Уллу чапыракълы кырдыкны ийиси ууакъ чапыракъланыкъындан эсе игиди, алай татыуу уа ууакъ кырдыкныкъы хайырлыды. Кёк чайны эм иги сорту битимни эм башында ёсген ууакъ чапыракъчыкъладан жарашдырылады. Кёк чайны татлы затла бла бирге ичерге жарайды, алай ичине атып, эритип угъай  -къабып-къабып. Кёк чай аллай «жагъынлы» затды - анга бал туз, варенье неда бал къошсагъыз, аны татыуу арталлыда тюрленип къалады.                                  Бу билдириуле  РИА Новости информагентствону сайтындан алынып басмаланыладыла. 

Поделиться: