Къабарты-Малкъарны бийик саугъасы

Къабарты-Малкъар эл мюлк ишлени (урлукъ себиу, тирлик жыйыу) тамамлауда, колхозланы эмда совхозланы онгларын кючлендириуде къыралны аллында борчларын жик жиги бла толтургъаны ючюн, СССР-ни Ара Толтуруу Комитетини бегими бла 1934 жылда 3 январьда Ленинни ордени бла саугъаланып, XVII партсъезд атлы Битеусоюз къызыл къангагъа тюшгенди.

Республиканы Архив службасында айтханларына кёре, бу орденни ол саугъалау болурну аллында къурагъан эдиле: СССР-ни ол даражалы къырал саугъасы 1930 жылда 6 апрельде чыкъгъанды.

Къабарты-Малкъар быллай даражалы саугъагъа тийишли болгъаны, къыралны багъыуда, аны аш-азыкъ жаны бла къоркъуусузлугъун жалчытыуда бийик жетишимлерине шагъатлыкъ эте эди. Аланы барын да бет жарыкълы уруннган жерлешлерибиз жалчытханларына сёз да жокъду. Сёз ючюн, 1934 жылда областьны колхозларында айырмалы ишлеген 17728 инсан бар эди. Ол санда 3154 тиширыу. Коммунистле бла комсомолчула уа социалист эришиуню ал сатырында баргъандыла. Аны аллында жылда Къабарты-Малкъарда колхозланы правленлеринде 363 инсан коммунистле эдиле. Дагъыда 236 бригадир, 34 эсеплеучю, 98 жылкъычы, 39 тракторчу, 963 колхозчу бар эди, 277 коммунист а бахчачылыкъ эмда малчылыкъ мюлкледе уруннгандыла.

Нальчикде 1934 жылда 15 майда онбеш минг адам жыйылгъан митингде Къабарты-Малкъаргъа Ленинни орденин къууанчлы халда бергендиле. Совет Правительствону атындан Ара Толтуруучу Комитетни секретары А. С. Енукидзе сёлешген эди адамланы алларына чыгъып. Алгъышлау телеграммасында аскер эмда тенгиз ишле жаны бла Халкъ комиссар, Реввоенсоветни башчысы К. Е. Ворошилов а былай жазгъанды: «Пролетар къыралны бу бийик саугъасына Къабарты-Малкъар социалист ишни айырмалы тамамлагъаны ючюн керти да тийишлиди. Къабарты-Малкъарны уруннган адамларын жюрегимден алгъышлап «Ура» дейме».

 

Улбашланы Мурат.
Поделиться: