Газет миллетни къыраллыгъын белгилейди

Озгъан жылны аягъында газетге жазылыуну эсеплери бизни къууандыргъандыла. Башхача айтханда ,2024 жылны биринчи жарымына «Заман» газетге 1700-ден аслам адам жаздыргъанды. Адам саныбыз бла тенглешдирип къарагъанда, кёрюмдюлерибиз бла ёхтемленирге боллукъбуз, ала игидиле. Бирси республикалы тёрт газет бла тенглешдиргенде уа, тиражыбыз иги да ёсгенди. Аны ючюн битеу окъуучуларыбызгъа ыспас этебиз, алгъышлайбыз, «Заманны» чынтты шуёхлары андан да кёп болурла деп ышанабыз.

Шуёхланы юслеринден айтханда, бек алгъа газетге жазылыугъа себеплик этген, аны тиражы ёсерине таза жюрекден къайгъыргъанланы энчи белгилерге сюеме. КъМР-де Адамны эркинликлери жаны бла уполномоченный Зумакъулланы Борисге, КъМР-ни Бийик-тау къырал табийгъат заповеднигини таматасы Асанланы Зейтуннга, Черек районну администрациясыны таматасыны кенгешчиси Байсыланы Харуннга, «Къайсыннга жюз атлам» тарых эм маданият эсгертмелени сакълау фондну таматасы Тетууланы Хадисге, Черек районда Халкъны социал жумушларын тамамлагъан комплексли араны оноучусуну къуллугъун толтургъан Улбашланы Келлетге, Тырныауузда бла Къашхатауда почталаны таматалары Афашокъаланы Русланнга бла Гажонланы Асиятха эм кёп башхалагъа жюрек ыразылыгъыбызны билдиребиз. «Заман» ыйыкъгъа юч кере басма амал бла чыгъады эмда сайтыбыз беш кере толтурулады. Андан сора да, телеграм-каналда эмда ВКонтактеде энчи бетибиз барды. Алада да шуёхларыбызны санына къошула барады.

Бюгюнлюкде газетни къагъыт тюрлюсюн сакълау эм айнытыу газетде ишлегенлени баш борчларындан бири болгъанын айтыр кереклиси болмаз. «Заман» халкъыбызны къыраллыгъыны магъаналы белгилеринден бириди десек, жангылмазбыз. Газет чыгъып башлагъанды биринчи, андан сора къуралгъанды малкъар театрыбыз, «Балкария» ансамблибиз, журналларыбыз да. Ол жууаплылыкъны ангылап, окъуучуларыбыз бла байламлыкъны юзмегенлей, аланы оюмларын да эсге ала ишлер, бизге жиберген материалларын да басмалар умутдабыз.

Жазылыу къалай баргъаныны юсюнден айтханда, ол бирси кезиуледен эсе къуралыулу болгъанды. Былтырча, бу жол да Нальчикде эм аны тийрелеринде орналгъан элледе жашагъанла тири къатышхандыла жазылыугъа, ала газетни 486 экземплярын аллыкъдыла. Эллерибизни ичинде эм иги кёрюмдюню Огъары Малкъарны почтасы болдургъанды,

анда газетни 158 юйюр жаздыргъанды. Почтаны таматасы Темуккуланы Аминатха эм аны биргесине ишлегенлеге редколлегияны атындан уллу ыспас этебиз. Элни администрациясыны башчысы Чаналаны Муса, эки школну да директорлары Жангоразланы Борис бла Темуккуланы Роза, газетни магъанасын ангылата, тири ишлегендиле, сау болсунла.

Тёреде болуучусуча, Кёнделенде жашагъанла газетни къадарына не заманда да уллу кёллю болмагъандыла. Элни администрациясыны башчысы                Атмырзаланы Марат ол жумуш бла байламлы энчи жыйылыу да бардыргъанды. Энди келир жылан 134 юйюр газетни аллыкъдыла. Ала мындан арысында кёп болурла деп ышанабыз. Былайда почтаны эки бёлюмюнде уруннганланы, арбаз сайын айланып, жазылыу ишни тири бардыргъанланы атларын сагъыныргъа тийишлиди. Атмырзаланы Дарина, Мамуколаны Назир, Отарланы Рамазан, Тюбейланы Клара, Балаланы Зухура, Улакъланы Танзиля, Отарланы Зурият, Ногъайлыланы Мариям, Элмурзаланы Абидат эм Маммеланы Мариям.

Бабугентни администрациясыны таматасы Жангуразланы Рамазан элге, газетни тиражына да къайгъыргъан адамды. Почтаны таматасы Гасыланы Нафисат жыл сайын да уллу къыйын салады жазылыугъа. Аны эм башхаланы хайырындан элде 113 юйюр аллыкъды «Заманны».

Башха эллерибизде кёрюмдюле уа былайдыла: Нальчик-120, Къашхатау-102, Хасания -97, Тырныаууз-93, Яникой -82, Тёбен Чегем- 67,Булунгу – 55, Герпегеж-52, Акъ-Суу- 45, Ташлы-Тала-45, Элбрус- 29, Лашкута-37, Хушто-Сырт-35, Быллым-18, Жангы Малкъар-17, Жанхотия-23, Хабаз-24, Кичибалыкъ -25, Къара-Суу - 21, Бызынгы-18, Огъары Жемтала-12.

 Урванда таулула- 12, эмда Бедикде, Шалушкада, Чегемде жашагъанла онушар экземпляр жаздыргъандыла. Ючюшер, тёртюшер, андан да аслам газет алгъан министерствола, тюрлю-тюрлю къырал биригиуле да иги кесекдиле.

Кесигиз кёргенликден, хар жерде да жазылыу кампания бирча бардырылмайды, алай ол ишге уллу кёллю болмагъан адам саны бла артыкъ уллу болмагъан эллерибизни- Булунгуну, Герпегежни, Ташлы -Таланы, Тёбен Чегемни, Хушто-Сыртны почталарында ишлегенлени- Акъайланы Фатиматны, Бёзюланы Аминатны, Таукенланы Сакинатны, Маммеланы Аминатны,  Байсолтанланы Лейланы, Гыжгыланы Танзиляны-энчи белгилерге сюебиз. Орта эсеп бла алгъанда, ол эллиле тири къатышхандыла  жазылыугъа.  Газетни малкъар тилни айнытыугъа эм сакълаугъа уллу къошумчулукъ этгенин ангылап, тиражыбызны ёсерине къайгъыргъан, анга жыл сайын кертичилей къалып, жазылыугъа себеплик этгенлени бир къауумуну атларын сагъыныуну тийишли кёребиз. Сюд приставланы федерал службасыны КъМР-де Управлениясыны таматасы Бауаланы Ахмат,  Элбрус районну администрациясыны башчысыны къуллугъун толтургъан Сотталаны Къурман, Черек районну администрациясыны башчысы Къулбайланы Алан, «Гипсолит» биригиуню таматасы Тохаланы Хыйса, «Маяк» санаторийни таматасы Мамайланы  Галина, «Долина нарзанов» санаторийни таматасы Чапайланы Ибрагим, Элбрус районда электросетьлени таматасы Хапаланы Юсюп,  КъМР-ни Парламентини депутатларына Насталаны Алий-Солтан бла Залийханланы Элдар,  Элбрус районну  Халкъны социал жаны бла жалчытыу комплексли арасыны директору Этезланы Мажит, Элбрус районну Урунуу, иш бла жалчытыуну эмда социал къоруулау арасыны  таматасы Мырзаланы Замрат эм кёп башхала.  Дагъыда предпринимательле Къазакъланы Батыр, Тохаланы Къурманбий, Тетууланы Илияс, Табакъсойланы Ахыя, Шунгарланы Хасан, Заммаланы Мустим, Энейланы Тимурлан, Чеченланы Сергей, Макытланы Талип, Забакъланы Къурманбий, Гузойланы Рашид, Герузланы Юсюп, Джаппуланы Руслан, Атмырзаланы Дарина, Мамуколаны Назир эм башхала (аланы барысын да бу материалда санар онг жокъду) газетни тиражыны ёсерине уллу себеплик этгендиле.

Атлары сагъынылгъанлагъа   редакцияда ишлегенлени, кесими атымдан да жюрек ыразылыгъымы билдиреме. Ала газетни тиражын кётюрюрге болушханлары бла малкъар халкъны маданият хазнасын, ана тилин сакъларгъа, тин хазнасын айнытыргъа да къошумчулукъ этедиле. Ол ишни тамамлауда газетибизни къаллай бир кючю болгъанын арсарсыз ангылайдыла.

Къонакъланы Хасан.
Поделиться: