Къыйынларына – бийик багъа

Былтыр «Спорт – жашауну низамыды» федерал проектни чегинде «Спорт элде» битеукъырал эришиу бардырылгъанды. Аны «Элдеги жаш тёлюню россейли союзу» биригиу къыралны Спорт министерствосуну себеплиги бла ётдюргенди.

 Проектни мураты физкультура-спорт организацияланы ишлеу, жарау этерге сюйгенлеге керекли онгланы къурау, сабийле, жаш адамла, абаданла да спорт бла кюреширча этерге эди. Анга башха-башха субъектледен элледе ишлеген коммерциялы болмагъан физкультура-спорт организацияла къатышхандыла, аланы араларында аскер искусстволаны «Барс-Тырныаууз» академиясы да болгъанды.

 - Тырныаууз бусагъатда шахар халлы посёлкагъа саналгъаны ючюн бизни да эришиуге къатышыргъа эркинлигибиз бар эди, - дейди академияны директору Виолетта Шпанагель. – Анда учрежденияда спорт иш къалай къуралгъаны эм аны качествосуна багъа бичилгенди, юйренирге къаллай бир адам келгенине, башха шартлагъа да къаралгъанды. Жылны ахырына уа эсепле да ачыкъ болгъандыла, алагъа кёре хорлагъанланы къауумуна киргенбиз, Къабарты-Малкъардан биз жангыз болгъанбыз. Бу жетишим бизге уллу магъананы тутады, тюз жолда болгъаныбызны энтта бир шагъатыды.

Саугъагъа академиягъа спорт оюнлагъа керекли инвентарь, спорт командаланы белгилери бла продукция берилгенди.