Жигитлени хурметлегендиле

Ташлы-Талада алгъаракълада Ата журтну жигитлерини кюнюн белгилегендиле. Туугъан жерлерин душмандан сакълагъан, ётгюр жашла таулу миллетде аз болмагъандыла. Аланы атлары, намыслары, жылла озгъанлыкъгъа, унутулмайдыла, бютюнда эллилерини араларында.

Тюбешиуню Россей Федерацияны гимни бла ачхандыла. «Россей уллу, тамаша жерди. Не заманда да жауларыбыз аз болмагъандыла. Заман тюрлене баргъанлыкъгъа, жигитлик тюрленмейди, ахшы уланларыбыз да туугъан жерлерин душмандан къорууларгъа хазырлай турадыла. Башыбызда кёк мамыр болур ючюн саулукъларын, жашауларын да аямайдыла, - дегенди тюбешиуню бардыргъан элде орта школну устазы Таукенланы Лейля.

Уллу Ата журт урушда жигитликлери бла атларын айтдыргъанланы да сагъыннгандыла ингирде. Адам саны бла эл гитче болгъанлыкъгъа, кеслерини ыразылыкълары бла фронтха алтмыш сегиз жаш кетгенлерин юсюнден видеоматериал да кёргюзтгендиле.

1979 жылда уа Афган уруш башланнганды. Анга ташлы-талачы жашла Байсыланы Билял, Таукенланы Солтан, Сараккуланы Мухтар, Казийланы Мухадин, Занибекланы Мурат да къатышхандыла. Сараккуланы Мухтар а ол кюн тюбешиуге келген жаш адамлагъа насийхат сёзлерин айтханды, туугъан жерлерине сакъ болургъа чакъыргъанды.

Бюгюнлюкде да, жарсыугъа, къыралыбызгъа хата келтирирге сюйгенле аз тюйюлдюле. Энчи аскер операция башланнганда биринчи кюнледе окъуна контракт жазып, ары баргъан жашларыбыз аслам болгъанларын белгилерчады. Аланы санында Къазийланы Илияс, Мамайланы Мухаммат, Бёзюланы Магомет да. Таулу уланланы жигитликлерини юсюнден энчи айтхандыла. Ала барысы да туугъан жерлери, адамла тынч-ырахат жашар ючюн кеслерин аямагъанларын билдиргендиле. Ызы бла окъуучула жигитликге жораланнган назмула окъугъандыла, патриот сезимни ёсдюрген жырла бла къууандыргъандыла.

Жыйылыугъа келген къонакъланы санында КъМР-ни Ата журтну къоруулаучулары фондуну регион бёлюмюню келечиси Тамерлан Кульчиев, Спорт министерствону информация-аналитика бёлюмню таматасы Зульфия Кумыкова да болгъандыла.

Энчи аскер операцияда жаралы болгъан Бёзюланы Магомет республиканы Спорт министерствосуну себеплиги бла паралимпийский спорт бла кюрешип башлагъанды. Къонакъла жашха тутхан ишин тийишли бардырырча садакъ керекле саугъалагъандыла. Урушну ачылыгъын сынагъан жигитлени барысына да саулукъ, узакъ ёмюр тежегендиле.