Бир кюннге юч бузукъчу табылгъанды

Бахсан районну полициячылары бир кюнню ичинде федерал излеуде болгъан эки эр кишини бла  тиширыуну ачыкълагъандыла. Ала башха субъектледе уручулукъ этгенлерине ишеклик барды. 
Аланы 11 сентябрьде оператив-излеу жумушланы  кезиуюнде РФ-ни МВД-сыны «Бахсан» муниципалитетле аралы бёлюмюню уголовный розыскыны къуллукъчулары  тутхандыла. Аладан бири, 23-жыллыкъ жаш адам, аны башы бир ненча кере сюдлюк болгъанды, Москвада уручулукъ  ючюн (РФ-ни УК-сыны 158-чи статьясы) терсленеди. 
33-жыллыкъ бахсанчыны да бу статьягъа бузукълукъ этгенине ишекликде Красногорск шахарны полициячылары излегендиле. 48-жыллыкъ тиширыу а Санкт-Петербургда хыйлачылыкъ бла кюрешгенди. Аны шахарны Приморский районуну право низамны сакълаучулары излегендиле. Ол алгъын да быллай аманлыкъ ючюн жууапха тартылгъанды. 

Адам да кёргюнчю ахчаны алып кетгенди
Быйыл 11 сентябрьде РФ-ни МВД-сыны Нальчикде управлениясына саулукъ сакълау учрежденияладан бирини башчысы кабинетинден 280 минг сом тас болгъанына тарыкъгъанды. Аны айтханына кёре, ахчаны жартысы организацияныкъы эди.
Уголовный розыскны къуллукъчулары, тийишли излеу-тинтиу жумушла бардырып, уручулукъ этгенине ишекликде 24-жыллыкъ тиширыуну тутхандыла. Аны айтханына кёре, ол алгъын мында ишлегенди, ол кюн а документлерин алыргъа келгенди. Директор отоуундан чыкъгъанын эслеп, адам да кёргюнчю ары киргенди эмда ахчаны алып кетгенди. 
Бу шартла бла байламлы уголовный иш ачылгъанды, ахчаны бир кесеги артха къайтарылгъанды. 

Мурдар кеф болгъаны тохташдырылгъанды
РФ-ни Следствие комитетини КъМР-де следствие управлениясыны келечилери Светловодское элде жашагъан эр кишиге ачылгъан уголовный ишни тинтип бошагъандыла. Ол РФ-ни УК-сыны 105-чи статьясыны 1-чи кесегине бузукълукъ этгенине ишеклик барды (мурдарлыкъ).
Терсленнген быйыл 13 майда 23 сагъатда танышы бла даулашып, аны башына бир ненча кере таш бла ургъанды. Алгъан жараладан ол алайда ауушханды. Следствие аманлыкъчы кеф болгъанын тохташдыргъанды.

Жолда жюрюуню жорукъларын бузуп, ючеуленни жашауун юзгенди 
КъМР-ни прокуратурасы авария этген водительге ачылгъан уголовный ишни къабыл кёргенди. Аны хатасындан жолда юч адам ёлгенди. Ол РФ-ни УК-сыны 264-чю статьясыны 5-чи кесегине кёре терсленеди. Башхача айтханда, жолда жюрюуню жорукъларына бузукълукъ этип, аны уллу кёллюлюгюню хатасындан эки эм андан да кёп адам ёлгени, адамны саулугъуна ауур заран салыннганы  ючюн терсленеди. 
Следствие тохташдыргъаныча, быйыл 7 февральда 18 сагъатда водитель жолда жюрюуню жорукъларына бузукълукъ этип, Урван районда аллына келген машиналаны жолуна чыгъып, башха транспорт бла къагъышханды. Анда келген тиширыуладан ючюсю ауур жарала алып, алайда окъуна ауушхандыла, бирини саулугъуна ауур заран жетгенди. 
Уголовный иш Урван районну сюдюне берилгенди.

Пенсиячыны алдап тургъанды
РФ-ни МВД-сыны Элбрус районда бёлюмюне быйыл 10 сентябрьде 37-жыллыкъ тиширыу келгенди. Ол кеси башха шахарда жашагъанын, алай дайым да Тырныауузда тургъан 75-жыллыкъ атасын жокълап тургъанын, бу жол а аны пенсиясыны бир кесеги тас болгъанын эслегинин айтханды. 
Бёлюмню уголовный розыскыны полициячылары, тинтиуле бардырып, ахчаны урлагъанына ишеклини ачыкълагъандыла. Ол 36-жыллыкъ тырныауузчуду, кеси да сюдню оноуу бла жууапха  бир ненча кере  тартылгъанды.  Эр киши акъсакъалдан узакъ болмай жашайды. Ол пенсия берилген кюнде таматагъа  аш-азыкъ алыргъа болушайым деген сылтау бла ахчасыны бир кесегин кесина алып тургъанды. 
 

 

Тикаланы Фатима хазырлагъанды
Поделиться: