Юйюрлени къолайлыкъларын игилендирир муратда

2024 жыл Россейде Юйюрню жылы белгиленеди. Аны бла байламлы бу материалда сабийлери болгъан юйюрлеге къыралны жанындан къаллай болушлукъ этиллигини юсюнден билдирирге сюебиз.

Бирикдирилген тёлеуле

Сабийден ауругъан тиширыулагъа бла бала туугъанда этилген тёлеулени  хар регион да жашау этерге жетерик ахчаны эм аз ёлчемине кёре тохташдырады.   2024 жылда тёлеуле кёбейтилип, орта эсеп бла 7 мингден 13,9 мингнге дери жетерикдиле - жашау этерге жетерик ахчаны жартысы тенгли неда толусунлай. Индексацияны хайырындан ахча 500-1000 сомгъа кёбейтилликди.

Сабийден ауругъан тиширыугъа тёлеуле да кёбейтилгендиле:  айгъа 8,4 минг сомдан башлап,  16,8 минг сомгъа дери берилликди.

Ай сайын тёлеулени аналыкъ капиталны ахчасындан алыргъа да жарайды.  Аны юйюрню къолайлыгъы жашау этерге жетерик ахчаны эм аз ёлчемини экиге кереленнген тарихден кёп болмагъан юйюр алыргъа эркинди (хар адам башына юлешгенде). Орта  эсеп бла  бу тёлеуле 15 минг сомгъа жетедиле.

Аналыкъ капитал

2024 жылда 1 февральда аналыкъ капиталны ёлчеми ёсдюрюллюкдю.  Шёндю юйюрге биринчи бала туугъанда   587 минг сом, экинчисине  — 775 минг сом бериледи.   2024 жылда 1 февральдан а аналыкъ капитал    биринчи балагъа 631 минг сомгъа, экинчисине уа - 834 минг сомгъа дери кёбейтилликди.

 Сабийден ауругъан тиширыугъа бала туугъанда берилген ахча да ёсдюрюлгенди. Декрет солуу 140 кюннге жетсе, тёлеуню ёлчеми  565 562 сом боллукъду.

Сабийге жыл бла жарым толгъунчу тиширыу декрет солуудан ишге чыкъса, анга баласына къараргъа ахча берилгенлей турлукъду. Бу къырал себепликни эм уллу ёлчеми   49 123 сомгъа жетеди.

Энтта бир жангычылыкъ. «Ана махтаулукъ» майдал берилген эмда «Жигит ана» сыйлы ат аталгъан тиширыулагъа этилген тёлеуледен налог алынмайды. Майдал 7 сабий, сыйлы ат а 10 сабийни ёсдюрген аналагъа берилгенин айтырчады.

Башында белгиленнген законла РФ-ни Президенти Владимир Путинни башламчылыгъы бла хазырланып, къабыл кёрюлгенлерин айтырчады. Ала къыралда сабийле ёсдюрген юйюрлени къолайлыкъларын игилендириуге бурулупдула.