Игилени атлары белгили боллукъду

Продукцияларыны качествосуна шагъатлыкъ этген сертификат алыргъа сюйгенлеге тийишли программаны былтыр Кавказ.РФ институт бла Роскачество бардырып башлагъан эдиле. Аны къурагъанла оюм этгенлерине кёре, Шимал Кавказда гитче эмда орта бизнес бла кюрешгенле продукцияларын сатханда онг алыргъа боллукъдула аны хайырындан. Къыралны башха регионларында да барды аллай ахшы сынам, деп чертгендиле КъМР-ни Экономиканы айнытыу министерствосунда.

Алай бла, бюгюнлюкге республикада эл мюлк товарла чыгъарыучуладан, къурулушчуладан, къолдан усталадан, тюрлю-тюрлю компанияладан жарым жюз чакълы заявка берилгенди. Сертификатланы уа алагъа къууанчлы жыйылыугъа чакъырып алай юлешгендиле. Анда биринчилени санында «Бахсанны бахчалары» да бар эди.

«Къыралыбызны хар региону да энчиди, хар биринде да ёхтемленирча продукциясы барды. Рынокда аланы юслеринден биледиле, туристле да сюйюп аладыла. Россейни Президенти регионлада белгили продукцияланы башхала да билирча этерге чакъыргъанды. «Кавказны продукциясы» деген система да ма анга себеплик этерге деп къуралгъанды», - дегенди жыйылыуда РФ-ни Правительствосуну Председателини орунбасары Александр Новак.

Кавказ.РФ-ни башчысы Андрей Юмшанов а «Кавказны продукциясыны» энчи белгиси боллугъун билдиргенди. «Бу проектге ышаннган предпринимательлеге сау болугъуз дейме. Кавказ атлары айтылгъан, ишлерини тасхаларын тёлюден-тёлюге жетдирген усталадан бай жерди. Биз регионла бла оноулашып, аллай усталагъа уллу ярмаркала къураргъа сюебиз. Быллай сертификат къоллу болгъанланы да алагъа къатышыргъа чакъырлыкъбыз», - деп чертгенди ол.