Минги тауда лыжала бла учхан жангы жолла ачылгъандыла

Аны хайырындан лыжала бла учхан жолланы узунлугъу 2,5 километрге кёбейгенди. Шёндю трассаланы сынай турадыла, къоркъуулу жерледе сеткала орнатхандыла, бир кесекден къоркъуусузлукъну жалчытыргъа деп белгиле да салынныкъдыла, деп билдиреди КъМР-ни Спорт министерствосу.

 Жангы жол «Пик Терскол» обсерваторияны къаты бла барлыкъды. Аны хайырындан лыжала бла учхан башха жолла бир кесек бош боллукъдула эмда сноубордистлеге онгларын кёргюзтюрге жангы онгла ачыладыла.

Жууукъ заманда къошакъ халда ачыллыкъ трассала эм эки жангы канат жол  уллу проектни биринчи кезиуюдю. Эсигизге салайыкъ, лыжала бла учаргъа уллу жерлени ачыуну хайрындан, машинала бла тохтаучу жерни къатындан узакъ болмай таугъа канат жол бла чыгъарча онг боллукъду эм трассала да эки кереге кёбейирикдиле.

 «Жангы жерлени 2026 жылда хайырланыргъа берилликдиле, аны хайырындан трассала 20 километрге узун боллукъдула эм беш канат жол ачыллыкъды», - деп айтылады билдириуде.