Къыйынларына – даражалы багъа

Экономикада, социал бёлюмде, жамауат жашауда, право низамны сакълауда жетишимле болдургъан жерлешлерибиз, къыркъдан аслам адам, къырал саугъала  бла белгиленнгендиле. Анга аталгъан къууанчлы жыйылыу Правительствону юйюнде болгъанды, анга КъМР-ни Парламентини спикери Татьяна Егорова, премьер-министр Мусукланы Алий, КъМР-ни Башчысыны Администрациясыны таматасы Мухамед Кодзоков эм башхала къатышхандыла.

КъМР-ни Башчысы Казбек Коков, жыйылгъанланы алгъышлай, Казбек Коков оза баргъан 2023 жыл сынауладан толу болгъанын, алай бизни халкъ, хар замандача, аладан бет жарыкълы къутулгъанын чертгенди.

- Къабарты-Малкъарны халкъыны жигерлигини, иш кёллюлюгюню хайырындан республиканы социал-экономикасын андан ары айнытыргъа онг болгъанды. Экономиканы баш магъаналы бёлюмюнде – промышленностьда – ёсюуню энчи белгилерге сюеме. Республикада чыгъарылгъан продукцияда жарашдырыучу эм женгил промышленностьну юлюшю ёсгенди,-деп белгилегенди регионну оноучусу.

Агропромышленность комплексде ишлегенле, хар замандача, бийик кёрюмдюле болдургъанларын айтханды Казбек Валерьевич. Будай ёсдюрюуде, тахта кёгетлени жарашырыуда республика къыралда алчыланы санындады. Къурулушда, жол мюлкде да иги жанына тюрлениуле асламдыла. Регионну оноучусу бютюнда жашау журтланы ишлетиуде жетишимлени белгилегенди.

Туризм да алгъа уллу атламла этгенин чертгенди Казбек Коков. «Туристле тохтарча жерле кёбейтиледиле, инфраструктура проектле толтуруладыла. Аны хайырындан а республикагъа къонакъгъа келгенлени саны ёсгенлей барады.   Битеу бу жумушла   бюджетни кеси файдаларын кёбейтирге онг бергендиле. Социал сорууланы тамамларгъа, тёлеулени, бюджет сферада ишлегенлени хакъларын ёсдюрюрге мадарла къуралгъандыла»,-дегенди КъМР-ни Башчысы.

 Казбек Коков РФ-ни Президентини башламчылыгъы бла къуралгъан миллет проектле социал бёлюмде жарсыулу сорууланы тамамларгъа себеплик этгенлерин айтханды. Саулукъ сакълау, билим бериу, культура, спорт, инфраструктура проектле жашауда бардырыладыла. Битеу бу затла республиканы халкъыны жашау болумларын игилендиргендиле.

- Жетишимледе Къабарты-Малкъарны халкъыны къыйыны уллуду, ол санда сизни да. Былайда экономиканы тюрлю-тюрлю бёлюмлерини келечилери жыйылгъандыла, къырал саугъалагъа тийишли болгъанланы арасында промышленностьда, эл мюлкде, къурулушда, культурада, билим бериуде, асламлы информация органлада ишлегенле бардыла,-дегенди республиканы башчысы.

 Энчи алгъыш сёзле дин къуллукъчулагъа айтылгъандыла. Ол кюн саугъаланнганланы арасында Шимал Осетия-Аланияны, Калмыкияны, Дагъыстанны, Ставрополь крайны  муслийманларыны дин идараларыны башчылары бар эдиле.

-  Сиз ёсюп келген тёлюню юйретиуде, миллетле эм динле аралы келишиулюкню сакълауда магъаналы иш тамамлайсыз,-дегенди Казбек Коков, аланы алгъышлай.

Энчи аскер операциягъа къатышып, Ата журтубузну эркинлигин сакълагъан батыр жерлешлерибизге ыразылыгъын да билдиргенди КъМР-ни Башчысы. «Республиканы битеу жамауаты да сизни батырлыгъыгъыз бла ёхтемленеди. Къысха замандан Хорлам бла ата-ана юйге къайтырыгъызны тежейбиз»,-деп къошханды.

2024 жылны юсюнден айта, регионну оноучусу анга ышаннгылы кёзден къарагъанын,  экономиканы андан ары айнытыргъа битеу онгла болгъанларын белгилегенди.

- Бизни баш борчубуз халкъны рахматлы, къолайлы жашауун жалчытыуду. Аналыкъны, сабийликни сакълаугъа, тамата тёлюню, ветеранланы излемлерин тапдырыугъа, энчи аскер операциягъа къатышханланы бла аланы юйюрлерине себепликге энчи эм буруллукъду,-деп сёз бергенди.

Келир жыл а РФ-ни Президенти айырыллыкъды. Къол кётюрюу къалай бардырылыгъы  къыралыбызны келир кюнюне артыкъда магъаналы болгъанын айтханды Казбек Коков. Аны себепли сайлау бузукъсуз, ачыкъ бардырылырга кереклисин чертгенди.

Сёзюню ахырында Казбек Коков залда олтургъанланы хар бирини кесини усталыгъы, сынауу, билими болгъанлыкъгъа, аланы барысын да сайлагъан ишлерине  сюймеклик эм кертичилик бирикдиргенлерин белгилегенди. «Сиз жашауда тюз жол сайлап, аны бла бет жарыкълы барасыз. Республиканы, Ата журтубузну айнытыуда жетишимле ючюн  тийишли болгъансыз къырал саугъалагъа»,-дегенди эмда жыйылгъанланы Жангы жылны байрамы бла алгъышлап, саулукъ, къолайлыкъ тежегенди. «Алай барыбызны да тилегибиз бирди – Хорлам. Кёп миллетли халкъыбыз, хар замандача, битеу кючюн жыйып, кертиликни сакъларыгъына ишексизме»,-деп къошханды.

Ызы бла саугъалау башланнганды. Къоркъуулу болумлада медицина болушлукъну бергенлеринде кёргюзтген сынаулары эм профессионал билимлери ючюн РФ-ни Президентини Указы бла КъМР-ни Катастрофаланы медицинасыны эм терк болушлукъ берген арасыны башчысы Алим Карданов бла врачла анестезиолог-реаниматологла  Бабаланы Вячеслав бла Олег Шебзухов Пирогов атлы майдал бла саугъаланнгандыла.

Араны медбраты-анестезисти Темур Кушхов эм гаражыны механиги Артур Назранов  «Ата журтну аллында къыйыны ючюн» орденни экинчи даражалы майдалына тийишли кёрюлгендиле.

Араны келечилери Лука Крымский атлы майдал бла да саугъаланнгандыла, аланы арасында директорну оператив иш жаны бла орунбасары Барат Кунбутаев, врачла анестезиолог-реаниматологла Астемир Муссаев бла Руслан Урусов. Бу майдал бла дагъыда Туберкулёзгъа къажау диспансерни анестезиология-реанимация бёлюмюню башчысы Ахматланы Руслан да саугъаланнганды.

Жамауат магъаналы жыйылыуланы   бардырыугъа салгъан къыйыны ючюн КъМР-ни Правительствосуну башчысыны орунбасары Залим Кашироков «Ата журту аллында къыйыны ючюн» орденни 2-чи даражалы майдалына тийишли кёрюлгенди.

КъМР-ни культура министри Мухадин Кумаховха «Культурада бла искусствода къыйыны ючюн» майдалгъа тийишли болгъанды. Къабарты-Малкъар къырал аграр университетни ректоратыны кенгешчиси Мухамед Шахмурзовха «РФ-ни бийик билим берген школуну сыйлы къуллукъчусу» ат берилгенди.

«КБР-инфо» информагентствону башчысы Атталаны Азнор а жамауат магъаналы жумушланы хазырлаугъа къатышханы ючюн РФ-ни Президентини Сыйлы грамотасы бла саугъаланнганды. Анга дагъыда «КъМР-ни сыйлы журналисти» деген ат да аталгъанды.

Кёп жылланы бет жарыкълы уруннганы ючюн Нальчикни спортну ветеранларыны советини башчысы Уяналаны Владимир «КъМР-ни аллында къыйыны ючюн» деген майдал бла белгиленнгенди.

Ол кюн КъМР-ни Сыйлы грамотасы бла саугъаланнганланы арасында РСО-Алания Республиканы, Дагъыстанны, Калмыкияны, Ставрополь крайны  муфтийлери Хаджимурат Гацалов,  Ахмед Абдулаев, Солтан Каралаев эм Мухаммед Рахимов бар эдиле. КъМР-ни Сыйлы грамотасы дагъыда Федерал налог службаны КъМР-де управлениясыны тамата къырал налог инспектору Бадалланы Жаннетге, КъМР-де МВД-ны уголовный розыск бёлюмюню башчысы Хапаланы Далхатха, КъМР-ни Урунуу эм социал къоруулау министерствосуну бёлюмюню башчысы Шауаланы Тахирге да берилгенди.

Ол кюн  КъМР-ни сыйлы эмда халкъ артистлерини,   врачларыны, экономистлерини, къурулушчуларыны, республиканы культурасыны,  билим бериуюню, физкультурасыны бла спортуну, промышленностуну сыйлы къуллукъчуларыны атларына тийишли болгъанла да саугъаланнгандыла.

КъМР-ни Башчысыны Ыразылыгъы берилгенлени  арасында КъМР-ни Правительствосуну башчысыны биринчи орунбасары Муаед Кунижев, «Дорремстрой 1» обществону водители Моллаланы Хамбий эм башхала да бар эдиле.

Къууанчлы жыйылыуну ахырында Казбек Коков жыйылгъанланы саугъалары эмда келе тургъан байрамла бла энтта бир кере алгъышлагъанды.

Тикаланы Фатима.