Ариу чачны ким да сюеди

Тиширыула тюбешип ушакъ бардыргъан кезиуде  бир бирлерини чачларына эс бурадыла. Ариу, къалын чач а хар адамгъа да табийгъат берген саугъады. Алай ол кесине энчи багъыуну излейди. Аны юсюнден парикмахер-стилист Сослан ШАШЕВ былай айтханды:

- Бек алгъа айтырыгъым, иги чач жаланда тыш кёрюмдюсю ариу, жылтырауукъ, сыйдам болгъан тюйюлдю. Кёпле чачлары алай болур ючюн хар эшитген амалларын этип, аны структурасын бузадыла. Бек башы – чачны тамыры къарыулу болургъа керекди. Кондиционерле аны жалчыталмайдыла. Ала чачны тыш кёрюмдюсюн ариу этедиле, алай тамырлары уа къургъакълай, къарыусузлай къаладыла.

Шампунь да болушалмайды тамырланы кючлерге. Ол чачны таза этеди, витаминле бла байыкъландыргъан а аны борчу тюйюлдю. Анга деп бальзамла, маскала бардыла. Ала кеслери да башха орунлада сатыладыла. Чачны жуугъан затланы да башны терисине кёре хайырланадыла. Терс сайланнган болса, ол габу этдиреди неда чачны тюшюреди. Тыш къыраллы бла ата журтлу шампуньланы башхалыкълары алай уллу тюйюлдюле.

Чачха багъыуда хайырланылгъан затланы аны структурасына кёре сайларгъа керекди. Тынгылы багъыу керек болгъанда, мен клиентлериме протеин-аминокислоталы маскаланы буюруучума. Аланы бир ыйыкъгъа 2 кере жагъып, 10-шар минут тутаргъа тийишлиди.

Башны жууу

Чачны тюз жууа билген да бек магъаналы ишди. Бек алгъа тамырларындан башлап, къыйырларына дери чачны жибитедиле. Ызы бла анга шампунь жагъадыла. Ол 5-7 миллилитрден аз болмазгъа керекди. Кёмюк этдирип, чачны терк окъуна чайкъайдыла. Ол кирни эм жауну чачдан кетерирге болушады. 
Аны бла жууу бошалмайды. Экинчи кере, биз шампунь бла кёмюк этдирип, чачны эки минут жууабыз. Андан сора аслам суу бла иги чайкъап, жанжаулукъ бла къургъакъсытабыз эм бальзам жагъып, таракъ бла иги тарайбыз. Бираз заман озгъандан сора, суу бла иги чайкъайбыз, жанжаулукъ бла дагъыда къургъакъсытабыз, алай тараргъа уа жарамайды. Аны фен бла аз-маз къургъакъсытхандан сора тарайдыла.

Габу

Башлары габу (себорейный дерматит) болгъаны кёп адамны жарсытады. Габу болууну бир ненча сылтауу барды. Аладан бири терс сайланнган шампуньду. Аны кетерир ючюн антигистаминни, эртеросорбенлени, активированный кёмюрню хайырланыргъа буюрама. Бу дарманланы бир ыйыкъгъа эки кере хайырланыргъа керекди. Башлары габу болгъан адамла сютден этилген, жаулары болгъан азыкъланы кёп ашаргъа жарамайды.

Бу затланы этерге жарамайды

Хуппегиден, жумуртхадан, майонезден эм коньякдан маскала этерге. Ала башны терисин сальмонеллёз ауруудан неда трихотилломандан (чачны саулай тюшюую) аурутургъа боллукъдула. Башда айтылгъан маскаланы барысыны орунларына да А, Е витаминни бир капсуласын хайырланыргъа боллукъду.

Чач тюкню къыйырыны эки айырылыулары

Ол да бек уллу проблемаладан бириди. Чач алай нек болады?
1. Асыры бек таралгъандан.
2. Керекли багъыу болмагъандан.
3. Адам кондиционер ишлеген отоуда кёп тургъандан.
4. Чач къыркъыучула ишлерин иги билмегенлеринден.
Чач тюкню къыйырыны эки айырылыуун кетерир ючюн аны «исси» къыпты бла кесиу, «зажигалка» эм башха приборла да болушмайдыла. Бу ишде «жабышдырыучу» жауну, эритиучю витаминлени неда чачны къарыулу этген препаратланы хайырланыргъа боллукъду.

Чачны тюшюую эм анга къажау кюреш

Чач тиширыуда, эр кишиде да тюшеди. Тиширыуда  ол сабий тапхандан сора, аны чархында темир жетишмей неда асыры ууакъ тишлери болгъан таракъ бла тарагъаны себепли болады.
Чач тюшмез ючюн баш териге тийишлисича багъаргъа керекди. Ол ишде спирти болгъан, витаминле бла байыкъландырылгъан препаратланы, мурсаны, наратны, дугъуманы, чай терекни жауу болгъан дарман сууланы хайырланадыла. Белогу, А, Е, цинк витаминлери болгъан продуктланы кёбюрек ашай турургъа тийишлиди.

Кюз арты-къыш кезиуде чачха багъыу

Кюз арты-къыш кезиуде чач энчи багъыуну сюеди. Аны ыйыкъгъа эки кереден кёп жууаргъа керек тюйюлдю. Нек дегенде кюз арты-къыш кезиуде хауаны температурасы терк-терк тюрленеди. Ол заманда чач юзюк-юзюк болады. Къышда аны кесини алгъыннгы тюрсюнюне бояргъа тийишлиди. Тышына чыкъгъанда, жаулукъ къысаргъа, бёрк киерге керекди.

Кетенчиланы Зульфия.
Поделиться: