Студентлени илму ишлерине – тийишли багъа

Къабарты-Малкъар къырал аграр университетни «Экономика эм управление» факультетинде регионну «Экономиканы «цифрагъа» кёчюрген сагъатда АПК-да предприятияланы ишлерин бардырыу: чурумла эмда аладан къутулур амалла» деген олимпиадасыны ючюнчю кесеги ётгенди. Аны чеклеринде 2-4 курслада окъугъанланы, магистрантланы эмда аспирантланы араларында эм иги илму ишге конкурс да бардырылгъанды.

Эришиулеге къатышханлагъа алгъышлау сёзлери бла факультетни башчысы Гумар Бекаров, илму-излем бёлюмню таматасы Аслан Жемухов, «Экономика» кафедраны башчысы Сафарби Пшихачев, деканны орунбасарлары Хочуланы Зухура бла Залина Иванова сёлешгендиле.

Озгъан жылны ахырында конкурсха жиберилген ишледе агропромышленность бёлюмде предприятияланы ишлерин жалчытыу соруула сюзюлгендиле. Студентле эксперт тинтиулени эсеплери бла шагъырейлендиргендиле, мультимедиа технологияланы кенг хайырланнгандыла. Жюри уа аланы ичлеринде эм иги ишлени айырып, Битеуроссей конкурсха къатышыргъа тийишли болгъанланы белгилегенди.

Алай бла «Стартап-проект» номинацияда экинчи курсну студенткасы Глашланы Хадижат хорлагъанды. Экинчи жерге тёртюнчю курсда окъугъанла Мурачаланы Салима бла Гайыланы Жамиля чыкъгъандыла. «Илму иш» дегенде уа биринчини Аурика Пазова алгъанды, экинчиге Алина Кодзокова тийишли болгъанды, ючюнчюню уа Мурад Гусейнов бла Инал Бижоев юлешгендиле.

Омарланы Мурат хазырлагъанды.
Поделиться: