Айырыула бузукълукъсуз ётерча

2024 жылны мартында Россейни Президентини айырыуларына хазырланыу башланнганды. Жамауат палатаны хар айырыу участкагъа жалынчакъсыз къараучуланы иерге эркинлиги барды, аланы борчлары айырыула ачыкъ ётерлерине, аланы эсеплери тюз чыгъарылырына къарауду, информация, эксперт, право жаны бла болушлукъ этиудю.

Алай бла палатада жамауат къараучуланы къаууму къуралгъанды, аланы юйретиу да башланнганды. Аланы дерсле берген преподавательле кеслери да  октябрьде Пятигорскда федерал экспертлени башчылыкъларында юйреннгендиле. Бу кюнледе уа Жамауат палатада къараучулагъа кезиулю семинар ётдюрюлгенди, аны палатаны келечилери Наталья Шинкарева бла Джульетта Тутукова бардыргъандыла. Наталья Шинкарева билдиргенича, бюгюнлюкге юйретиуле Терк, Прохладна, Май эм Черек районлада болгъандыла.

Семинарла эки кюнню ётдюрюледиле, алагъа лекцияла, практика да киредиле, юйретиу презентация 186 слайддан къуралады. Энчи эс Конституцияны, бу жаны бла законодательствону, Уголовный, Административный кодекслени, норматив-право актланы билдириуге бёлюнеди. Ала айырыулада адамлагъа ангылатыула этерге, аланы эркинликлери бузулмазына сакъ болургъа керекдиле. Жамауат къараучула болургъа сюйген адамланы араларында алгъадагъы айырыулада да бу жумушну толтургъанла, бу ишге энди киришгенле да бар эдиле. Усталыкъ жаны бла къарагъанда, палатагъа жыйылгъанланы араларында устазла, юйретиучюле, алимле, предпринимательле да болгъандыла.

Кульчаланы Зульфия.
Поделиться: