Сейирсиндирме сёзлюкню баргъаныГ Габаш, гамож – кийизден не сахтияндан этилген юйде кийиучю женгил аякъ кийим. Габушур – ташны юсюн жапхан къаты топуракъ. Гагарак – нарат топ, шишка Гагаш, гагу – нарат, каштан битимле. Шишки. Гадура – иничке чыбыкъладан не къылдан чалдиш эшилген сют сюзген адыр. Гажаз – элсиз, юйсюз. Газиз – хурметли, жандауурлу, къайгъырыучу. Галак – иесизлей къалып, кийиксиген, бёрю жашаугъа ётген ит. Галакур – къошуннга оюула, суратла салгъан бояу. Галму – эрудиция. Гаммос –итлени гумхотларына салыныучу нохта. Намордник. Ганиба – къумачха, башха юс кийимге, жаулукъгъа, юй харакетге къол бла салыннган жибек оюу, тамгъа. Гаппар – жара къотурну баш къабугъу. Гариф – билгич, таныгъыч, ууажип. Гауел – къар къатыш шулпу. Гая – чексиз уллу аууз. Адамны жухун жаратмагъанда айтылыучу къакъды сёз. Гебенек – къош къанатлары тамгъалы болуучу, хауада учхан къумурсха. Гёбелек – къанатлары тюрсюнсюз, отну, чыракъны тёгерегине учаргъа ёч къумурсха. Гебох – 1) къыйыры жютю аскер сауут; 2) жукъгъан аурууну аты. Сибирская язва. Гедра, госта, шылап – алаша, гитче адамчыкъ. Лилипут. Гелетеу – хыш-мыш, тизгинсиз адам. Гелеу – тауда, кюнлюм бетде къыш да кёгергенлей тургъан татымлы, къаты кырдык. Генезир – аскер кийимли, юсюне сауут-саба, жор, майдал дегенча, тапханын тагъып, кесин сымарлап айланыучу адам. Генжетай – быштады байталны ал тайы; мифледе – тулпар тайчыкъ. Гепха, гыпхы – 1) бийни неда дин къуллукъчуну баш кийиминде даражасын кёргюзтген белги; 2) устала сахтияннга, териден тигилген башха кийимлеге, багъалы затлагъа накъышла, ызла, оюула салгъан, сюекден ишленнген жютюбурун керек. Гепхин – албота. Герменчик – гитче къалачыкъ; аскер бир ауукъгъа тохтагъан жер. Гернеуюл – къара-къатыш. Герхана – жибек, чилле халыладан согъулгъан къумач. Парча. Гёбел – асыры къубултулгъан сабий, къыз. Гёдю – тыйгъысыз, саякъ. Гёзен – юй хапчук, ырысхы тургъан мюйюш, отоу. Гён – иги ийленнген, къарагъа боялгъан тууар тери. Гёренке – ауурлукъну ёлчеми – 400 грамм. Гиба – секира. Гибир – жангы къар жумушакълай тургъанлай, баш къатханы. Гида – аскер сауут, секира. Гидана – кюмюшчюню къарасауут бояуу Гиздах – мужура темир, сабан агъачны кереги. Гизи – жангы туугъан тонгуз балачыкъ; кошт – айдан атлагъан, алты айлары жетгинчи тонгуз бала; чочха – алты айдан жылгъа жетгинчи тонгуз бала. Гиздох – къойчу таякъны гулочу. Гина – сабан боюнса. Гинадур – кюмюш бояу. Гогалай – къарачайлылада нартюх кочанны ууулгъандан сора къалгъан агъачы. Годур – къарыулу, тёзюмлю (ат, эшек). Гола – къаядан юзлюп, сыртда, ёзенде тохтагъан уллу таш. Голлас – тизгинсиз. Голункъылды – эчкичи къуш. Голлуча – голлу байрамлада хорлагъанлагъа ёчге берирге деп жыйылгъан ырысхы. Горсай, чалмар – юйню, жыйынны, бачаманы сакълагъан (кютген) къалауур. Горча – къобарылып къурутулгъан къой сыгын; къыйы – кесилип къурутулгъан отлукъ; сыгын – мал бокъну къатышдырып, ийлеп, не къол бла, не кеп бла жазып, къалау этип къурутулгъан отлукъ. Гота – терен хуржун; гыржын къап. Губулашха – арбаны боюнсагъа къошхан айры агъач. Гуждар – кийик сюрюуде башчы теке. Гуза – тохун бла къуршоуну бирге къошхан къылычла. Спицы. Гулос (гулоч) – таякъны, сабан агъачны къол тутхан жери. Гума – халкъны аскер харекети сакъланнган жер. Орус тилде арсенал. Гуммос – ындыр басхан заманда ёгюз киреге кирмез ючюн салыннган ауузлукъ Гуму – бурун таулу юйледе аш-азыкъ тургъан жер. Гумул – сюленни экинчи сюзюлгени. Биринчиси бозады. Гурушха – ишекли болуу, ийнанмау. Гыбыр – битимсиз жер. Гыбыт къобуз – къыл къобузланы бир тюрлюсю. Гыдай – мюйюзсюз мал. Гызма – узун чырпа чач. Гызмар – къызгъанч, къызгъанчлыкъ. Гызна – тауукъланы бир тюрлюсю. Гыйы – къая жаркъа; къабыргъагъа салыргъа жараулу, кеси аллына тюз, ариу жарылгъан таш. Гыл – хайыр, тюк, ырысхы, ашау. Гылгын – ичи хосу болуп ёсген бийик ханс Гыпхынла – сыннганны, чыкъгъанны салгъанда, адамны сюегин къысдырып байларгъа жюрютюлген жукъа къангачыкъла Гылгыт – акъ чарс, кёзбау къарам. Гылжа – къынгыр, буруш. Терсмюйюз ийнек Гылла – кенгмюйюз ёгюз. Гырна – бахсанчылада басха (агъачдан этилген сабан адыр). Гыртман – тюгю кетген, азгъан эшек. Гырын, гыраж, чалтыр – къартайгъан базыкъ терекледе болуучу тешикни атлары. Дупло. Гысты, гюлте – салам баула. Гыпы – сютден этилген ички ашарыкъланы арасында бек файдалысы, саулукъгъа игиси. Гюлеш – чыбыкъ гысты. Гюлтемиш – тёртчарх арбаны арт жаны. Гюрбе – мирзеу орун. Гюрбю – сюзюк жюнден этилген юс кийим. Гюргюлюш – тартыш оюн. Гюргюр – базыкъ ён, макъам; баргъан сууну тауушу. Гюрегей – мысты жемиш. Гюрен – мал орун. Гюх – нартюх тартхан къол адыр; къол тирменнге ушагъан сай кели Гъ Гъойгъун, гойча, гъыйгъа – ауана жерледе, чегетледе ёсген, уллу, къалын сюйрю къауаз чапыракълы ханс.
Поделиться:
Читать также:
12.04.2024 - 08:30 →
Аламгъа эмда кёп илму жангычылыкълагъа жолну ачхан таулу академик
21.03.2024 - 09:33 →
Эсленирча ыз къойгъанды
18.03.2024 - 14:52 →
Бардыргъан жумушуна кёлюн бере, жетишимлеге жетеди
01.02.2024 - 12:54 →
Кёрмючге къараргъа чакъырадыла
17.01.2024 - 12:17 →
Жютю, кесгин да эшитилген юйретиуле
|