Къоншу участкаланы иелери бла арада чеклени тохташдырыу

Быйыл июньда РФ-ни Президенти къабыл этген закон бла «Кадастр ишни» эмда «Жеринден тепдирилмеген мюлкню къырал регистрациясыны» юсюнден законлагъа тюрлениуле сингдирилгендиле. Алагъа кёре, къоншула бла келишип, Федерал кадастр палатада арада чекни тохташдырыу инструкцияны хазырлагъандыла, деп билдиргендиле КъМР-ни Экономиканы айнытыу министерствосундан.

«Кадастрны юсюнден законда айтылгъаныча, чек къалайда болгъанын тохташдырырдан алгъа къоншу участкаланы иелери бла келиширге керекди. Бу иш межевание этгенде неда бирикген къырал реестрде (ЕГРН) чекни юсюнден информация болмаса, борчлу халда тамамланады. Ол ишни кадастр инженер тындырады. Аланы арасында эм иги специалистни сайларгъа сюйгенлеге «Кадастр инженерлени реестри» деген сервис барды. Аны ким да хайырланыргъа боллукъду», - дегенди Федерал кадастр палатаны башчысыны орунбасары Марина Семенова.

Кадастр инженер, чекни тохташдырырдан алгъа, къоншу участкаланы иелери бла тюбешип, аланы хар биринден да (неда келечилеринден) къол салдырып ыразылыкъ (акт) алады неда уа барын да бир кюн жыйып оноулашады. Тюбешиу къачан эм къалайда боллугъун письмо бла эм азындан бир ай алгъа билдирирге керекди. Келишиулюкню актына чек тюз тохташдырылгъанын кёргенден сора къол салыргъа керекди.

Къоншу бла бир оюмгъа келирге амал жокъ эсе, аны юсюнден кадастр инженерге жазып билдирирге тийишлиди. Ол аны келишиулюкню актына къошарыкъды, межевой планда да кёргюзтюрюкдю. «Закон бла кадастр инженерни жер даулашлагъа къатышыргъа эркинлиги жокъду, къоншула келишмеселе, участкаланы регистрациясы этилмейди. Ким тюз неда терс болгъанын тохташдырырча сюдге барыргъа керекди», - деп белгилегенди Марина Семенова.

Кадастр инженер къоншу къайда жашагъанын табалмаса, анга жибериллик билдириу жер-жерли газетде басмаланады. Ол адам аны окъумагъанлыкъгъа да иш этилмей къаллыкъ тюйюлдю. Ол жууап бермесе неда жыйылыугъа келмесе, къоншу бла арада чекни дурус кёргеннге саналлыкъды. Алай болмазча уа жерни иеси МФЦ-гъа барып, кесини почта неда электрон адресин ЕГРН-ге тюшюрюрге керекди.

Законну энтта да бир игиси - энди кадастр инженерлеге сагъынылгъан реестрден сурап информация алыргъа эркинлик бериледи. Ол да кёп тыйгъычланы кетереди.