«Къаллай бир сюйсенг да аша»

Бахчабызда ёсген тахта кёгетлени не хайыры болгъанын тынгылы билмейбиз. Врач-диетолог Доттуланы Фатима хобустаны юсюнден айтханды:

 - Хобустаны тахтадан алыннганлай, къууурулгъанлай, тузланнганлай да хант къангабызгъа салмагъан юйюр арабызда не хазна табылыр. Орус халкъ багъыу жазмалада хобустаны аслам ауруугъа хайырлылыгъын белгилеген юлгюле келтириледиле. Андан сыгъылгъан суу губузланы тюшюреди, тузланнганныкъы уа тутхан ауруугъа себеплик этеди, эски жараланы бла хыппиллени къатдырады, сабийли тиширыуланы ашларында болса, сютлерине къошулады, кёзлени саулукъларына да игиди.

Кырдыкла бла багъыу амалланы юсюнден кечирек чыкъгъан китаплада аны файдалы амаллары бютюн кенгертилгендиле: бусагъатда тахтадан алыннган хобустаны бла андан сыгъылгъан сууну геморройдан, диатезден, солуу органланы, талакъны, бауурну аурууларындан къыйналгъанлагъа буюргъандыла эмда ол цингагъа жарагъан кючлю дарманнга саналгъанды.

Хобустада хайырлы затланы тизмеси уллуду.  Андан сора да, хар сортну жаланда анда тюбеген энчиликлери барды. Битеу да бирге алып айтханда, сёзсюз, анда баш магъананы тутхан а С витаминни асламлыгъыды. Ол бу жаны бла лимоннга, апельсиннге окъуна оздурмайды.

Кёгетде В, РР, К эм U къауумланы витаминлери, пантотеновая бла фолиевая кислотала, провитамин А да бардыла. Минерал затла да асламдыла: калий, кальций, фосфор, марганец, железо. Бу хайырлы затлагъа дагъыда фитонцидле, сахарла, ферментле да къошуладыла. Анда углеводланы азлыгъы уа кёгетни диабетиклени ашларына къошаргъа да онг береди. Тартроновая кислотаны болгъаны уа жауланы эритирге себепди. Ол дегенибиз, къаллай бир сюйсенг да аша – ауурлукъгъа къошулмайды.