Къырал себепликни мадарлары кенгертиледиле

Энчи аскер операциягъа къатышханлагъа къошакъ къырал себепликни мадарлары кийирилгендиле, аналыкъ капиталны хайырланыргъа жарагъан тизме кенгертилгенди, къыралда саулукъларына кёре чекленнген онглары болгъанлагъа реабилитацияны бирикдирилген системасы къуралады. Къырал дума бу кюнледе къабыл кёрген законланы магъаналарын ангылатабыз.

Энчи аскер операция

РФ-ни Къырал Думасы мобилизация бла аскерге чакъырылгъанлагъа кредит каникулланы болжалын бир жылгъа созууну юсюнден законопроектни ючюнчю окъулууда къабыл кёргенди. Законда дагъыда аскерчи борчун толтургъан кезиуде жан берген кезиуде, ол къол салгъан  кредит келишимни кючю тохтатылгъаны белгиленеди.

Думаны финанс рынокла жаны бла комитетини башчысыны биринчи орунбасары Константин Бахарев айтханыча, документ  энчи аскер операциягъа къатышханланы эм аланы юйюрлерини законлу сейирлерин бла эркинликлерин сакълаугъа бурулупду. Былтыр   СВО-гъа къатышханлагъа бла аланы юйюрлерине бир жылгъа кредит каникулла алыргъа эркинлик берген закон къабыл кёрюлген эди. «Операцияны кезиуюнде ауушхан неда сакъатлыкъ тапхан (1-чи къауум) инсанланы кредит борчларын кетериуню юсюнден оноу этилген эди жай сессияда. Дагъыда   созаёмщик, асламында уа ала юй бийчеледиле,    эркин болгъанды борчдан. Энди уа биз энтта бир атлам этгенбиз – быллай оноу ышаннгылы адам бла байламлы да къабыл кёрюлгенди»,-дегенди депутат.

Парламентарийле энчи аскер операциягъа къатышханланы бла аланы юйюрлерини эркинликлерин сакълау жаны бла къаллай мадарла керек болгъанларын сюзюп турлукъларын белгилегенди Константин   Бахарев.

Аналыкъ капитал

РФ-ни Къырал думасы аналыкъ капиталны ахчасын аз къатлы юйледе (таунхаус) фатарны жангыртыугъа къоратыргъа эркинлик бергенди. Ол жаны бла закон бу кюнледе ючюнчю окъулууда къабыл кёрюлгенди.

Тюзетиуле «Сабийлери болгъан юйюрлеге къырал болушлукъну къошакъ мадарларыны юсюнден» федерал законну 10-чу статьясына кийирилгендиле. «Алай бла аналыкъ капиталны болушлугъу бла юйюрле жашау болумларын тапландыраллыкъдыла,-дегенди Думаны башчысы Вячеслав Володин, законну юсюнден оюмун билдире. – Ахчаны таунхаусланы жангыртыугъа къораталлыкъдыла. Аллай журтланы саны ёсгенин эсге алсакъ, бу мадарла артыкъда магъаналыдыла».

Аналыкъ капитал къыралда демография болумну игилендириуге этген себепликни эсге алып, ахчаны хайырланыргъа жарагъан жумушланы кенгертиу иш андан ары да бардырыллыгъын белгилегенди Вячеслав Володин. Программагъа ахча келир жылны бюджетине салыннганды, аны индексациясыны ёлчеми да къошулгъанды.

 Социал реабилитация

Сакъатланы социал реабилитациясы жаны бла закон экинчи окъулууда къабыл кёрюлгенди. Ол саулукъларына кёре чекленнген онглары болгъан 11 миллион инсанны бла 730 минг сакъат сабийни  жашау халлерин игилендирликди.

 Алай бла къыралда сакъатланы реабилитациясыны бирикдирилген мадарлары сингдирилликдиле. Аны бла бирге къырал себепликни системасы къураллыкъды: социал-психология эм медицина болушлукъдан башлап, саулукъларына кёре чекленнген онглары болгъанланы усталыкъгъа юйретиуге дери. 

 Сёз сабийлени эм таматаланы реабилитациясыны юсюнден барады. «Саулукъларындан къыйналгъан сабийлеге (юч жылгъа дери) эм аланы юйюрлерине ал кезиуде  болушлукъну мадарларыны жорукълары биринчи кере тохташдырыладыла,  реабилитацияны ол жаны бла  энчи бёлюмю боллукъду»,-дегенди Вячеслав Володин законну магъаналылыгъыны юсюнден айта.

 Бирикдирилген низам болмаса уа, хар регион да реабилитацияны кесини онгларына кёре бардырлыкъды. Асламында адамгъа медицина болушлукъ этип, аны жамауат жашаугъа сингдириуге, усталыкъ бериуге эс бурулмай къалгъанын белгилегенди Думаны башчысы. Белгиленнген закон къабыл кёрюлсе, регион башхалыкъла кетерилликдиле.