"Россейни акъ зурнуклары-2018" деген битеуроссей конкурсда хорлагъанланы КъМР-ни Жарыкъландырыу, илму эмда жаш тёлюню ишлери жаны бла министерствосунда къууанчлы халда саугъалагъандыла. Бу даражалы эришиуледе бизден отуз юч школчу, ол санда жыр, тепсеу, сабий фольклор коллективле да, айырмалы болгъандыла.
Аланы алгъышларгъа башда айтылгъан ведомствону башчысы Ауес Кумыков, КъМР-ни культура министри Мухадин Кумахов, республиканы Жазыучуларыны союзуну правленини председатели Беппайланы Муталип келген эдиле.
-Бу хычыуун жумушну уллу ыразылыкъ бла толтурама. Нек дегенде конкурсха жиберген чыгъармачылыкъ ишлеригизге къарай, аланы терен магъаналы, оюмлу болгъанларына къууаннганма, барыгъыз да фахмулула болгъаныгъызгъа тюшюннгенме. Анга бу китапны ал эмда ахыр бетлеринде сиз ишлеген суратланы салыннганлары да шагъатлыкъ этеди. Аланы кёргенимде уа, ёхтемлигими чеги жокъ эди,-деп, Ауэс Кумыков хычыуун жумушну тамамлаугъа киришгенди: федерал саугъаланы - Халкъланы шуёхлукъларыны "Россейни акъ зурнукълары-2018" деген сыйлы белгилерин - районланы билим бериу управленияларыны башчылары Тамара Абреговагъа, Жанна Арипшевагъа, Атаккулланы Нюржаннга, Татьяна Василенкогъа бергенди. Конкурсну тюрлю-тюрлю номинацияларында хорлагъан школчуланы араларында Бабугент элден Асанланы Саматны, Тырнаууздан Жаппуланы Расулну, Диналаны Тамерланны, Малкъарланы Фатиматны, Жаппуланы Лейляны да атлары айтылгъандыла.
Байрамда белгили жырчы Гайыланы Тахир, школчу Жаппуланы Лейля да жырлагъандыла, сабий чыгъармачылыкъны "Кюн шахар" академиясында "Жилтин" деген клубдан Даниил Кан республикагъа, шуёхлукъгъа жоралап жазгъан назмусун айтханды. Къулийланы Къайсынны "Къама" деген чыгъармасын а Асанланы Самат аламат ариу окъугъанды.
Эсгертиу: "Россейни акъ зурнуклары" деген конкурс жарыкъландырыу проектге кёре къуралып, жыл сайын бардырылады. Аны мураты - миллетлени араларында шуёхлукъну кючлендириудю эмда айнытыуду, жаш фахмулуланы ачыкълауду, алагъа себеплик этиудю. Анга РФ-ни Федерал Жыйылыууну Федерация Совети бла Къырал Думасы, Россейни Жарыкъландырыу министерствосу, Москва шахарны Билим бериу департаменти эмда Россейни Жазыучуларыны союзу тутхучлулукъ этедиле.
Быйыл бизни школчуларыбыз а литература-суратлау эмда музыка-чыгъармачылыкъ жаны бла эмда «Россейни жаш солдатлары» деген номинациялада айырмалы болгъандыла. Аланы ишлери "Халкъланы шуёхлукълары - Россейни деменгилилиги" деген жыйымдыкъгъа киргендиле. Конкурсну республикада къураугъа КъМР-ни Жарыкъландырыу, илму эмда жаш тёлюню ишлери жаны бла министерствосуну бёлюмюню таматасы Ахайланы Лариса уллу къыйын салгъанды.
