Эм игилени белгилегендиле

Нальчикни маданият айнытыу арасында КъМР-ни Миллетлени ишлери эм жамауат проектле жаны бла министерствосу 2023 жылны эм иги коммерциялы болмагъан организацияланы (НКО) белгилегенди. Ары келген къонакъланы санында Парламентни Маданият, граждан обществону айнытыу эм информация политика жаны бла комитетини башчысы Заурбек Кумалов, КъМР-ни урунуу эм социальный къоруулау министрни орунбасары Елена Романова, Урушну, урунууну, Саутланнган кючлени эм право низамны сакълаучу органланы ветеранларыны Нальчик шахарда советлерини башчысы Абдуллаланы Мустафа да болгъандыла. Саугъалагъан а «Игиликни жолу бла барыуу», «Граждан эм социал-маданият башламчылыкъла», «Эсде тутабыз-ёхтемленебиз», «Миллетле аралы келишиулюк»  деген номинацияда бла этгендиле.

Жыйылыуну ача, ведомствону башчысы Анзор Курашинов бу проектде хорлагъанланы алгъышлагъанды. Быйыл иги жетишимлеге жетген, жамауатха болушлукъ этген биригиуле асламдыла. Аланы барысы да республикабызгъа себеплик этгенлерин да энчи айтханды министр. Сайлагъан да тынч болмагъанын чертгенди ол. « Ким алчы болгъанын мен да билмейме, аланы атлары конвертлени ичлериндедиле. Бюгюн аланы бирге ачып, алгъышларыкъбыз»,- дегенди Анзор Владимирович.

«Игиликни жолу бла барыу» деген бёлюмде  къыйын болумлагъа тюшгенлеге жашау халларын игилендирирге аланнганла эм алагъа социал болушлукъ этгенле, сакъат, ауруулу сабийлеге эс тапдыргъанла, къачхынчылагъа, жыйырма юч жыллары толмагъан къыйын болумлагъа тюшгенлеге амал этген биригиуле киргендиле.

Бу бёлюмде Аскерде сакъат болгъан «Воин» деген ьитеуроссей жамауат организацияны регион бёлюмю хорлагъанды.

 «Добрая среда», «Милосердие 07», Пятигорск эм Черкесск Епархияны Нальчик килиса округуну благочиниясы да бу номинацияда лауреатла  болгъандыла. Дагъыда «Сангырауланы спортуну федерациясын» эм «Сокъурланы битеуроссей биригиулерин» белгилегендиле.

-Бизни проект эм игилени санында болгъанына бек къууанабыз. Сабийлеге болушлукъ этген, аланы жюреклерин къууандыргъан барыбызны да борчубузду. Быйыл къауум номинацияда алчы болгъанбыз, ишибизге бийик багъа берилгени уа  мындан ары да жумушубузну жетишимли бардырып турургъа кёллендиреди, – дегенди «Добрая среда» организацияны башчысы Анжела Люева.

«Граждан эм социал-маданият башламчылыкъла» деген номинацияда илму, маданият, саулукъ сакълау, юйюр эм юйюр жашауну кючлендириу институт, табийгъатны  сакълау жаны бла биригиулени ишлери сюзюлгенди. Алчы жерге уа КъМР-ни «Авангард» аскер-патриот биригиую тийишли болгъанды. Аны башчысы Аслан Лихов аскерчилени хазырлаугъа уллу эс бургъанларын айтханды. Кийимле хазырлагъандан сора да, билим берген учреждениялада ОБЖ дерсге уллу эс бурадыла. «Бюгюнлюкде  энчи аскер операция барады, бизни баш муратыбыз ары баргъанлагъа болушлукъ этиудю. Ол жумуш терк бошалып, Жигит уланларыбыз сау-саламат юйлерине жыйылсынла. Школ кезиуден окъуна жашланы аскер жаны бла билимлери иги болууну магъаналыгъыт уллуду»,- дегенди ол.

Бу номинацияда дагъыда КъМР-ни волонтёрукъну айнытыуну ресурс арасын, Нальчикни Тиширыуларыны советин эм «КъМР-ни аскер искусстволаны  айнытыу фондну», Орус тарыхны бла маданиятны «Вече» биригиуюн  белгилегендиле.

«Эсде тутабыз-ёхтемленебиз» деген номинацияда уа биринчи жерге запасда офицерлени «МЕГАПИР» организацияларыны регионда бёлюмю тийишли болгъанды. Дагъыда КъМР-де «Россей ючюн» халкъ фронт», Афганистанны эм башха аскер къаугъаланы  ветеранларыны биригиую, ветеранланы союзуну Нальчикде организациясы, «Аскер къарындашлыкъ» битеуроссей ветеран биригиуню, эм башхаланы белгилегендиле.

«Миллетле аралы келишиулюк» деген номинацияда уа алчы жерге  «Чркес халкъны бириудириу, черкес диаспораны тарых Ата журтлары бла байламлыкъларын айнытыу жаны бла халкъла аралы черкес ассаоцияация» жамауат биригиулени союзу тийишли болгъанды. Дагъыда бу номинацияда «КъМР-ни В.Вороков атлы маданият фонду», Муслийманланы дин управлениясы, «Къатынгдагъына болуш» волонтёр биригиулени ахшы ишле бардыргъанларын энчи чертип саугъалагъандыла.

Сыйлы къонакъланы жаш фахмула патриот жырла бла  къууандыргъандыла. Тюбешиуню ахырында алчы болгъан биригиулени келечилерин сахнагъа чакъырып, эсде къалырча суратлагъа тюшгендиле.

Темуккуланы Амина.
Поделиться: