Иесиз итле къышда орамда къаллыкъ тюйюлдюле

Нальчикде 130 хауле итге юй хазырды. Хау, биринчи хапар 500-ню юсюнден бара эди: шахар администрацияда билдиргенлерине кёре, къурулуш энтта да бардырыллыкъды, баям, жууукъ жыллада орамлада ашсыз-суусуз айланнган иесиз итле боллукъ тюйлдюле.

Бюгюнлюкде да бек уллу жарсыуладан бири – юйсюз итледиле. Аппала-ыннала, атала-анала сабийлерин школланы эшиклерине дери ашырадыла, бир парий къабар аны деп къоркъуп. Жарсыугъа, ала сабийлеге угъай, уллулагъа да чабадыла, бир-бирле больницагъа окъуна тюшгендиле. Алай бу жарсыулу болумда терслик итледе тюйюлдю, адамладады. Кёпле кючюкню алып, ойната, къубулта кетип, эрикселе уа, орамгъа къыстап къоядыла. Кючюк гинжи тюйюлдю, аны жаны барды, ол иесине юйренеди, юйден къысталгъанын ангылап, артда орамда жиляп турады.

Мен Нальчикде юйсюз итлени юйлерине алгъан адамланы таныйма. Ала айтханнга кёре, къысталгъан итле айла бла жиляйдыла, юйлерин, юйреннген, сюйген адамларын излеп. Бизде уа къалай болады? Къарт болгъанлай – кет! Ауругъанлай – кет! Аланы шахарны къыйырына элтип атадыла, артха къайтсала уа, тюйюп къыстайдыла.

Шёндю не парклада, не орамлада сабийле къоркъмай жюрюялмайдыла: ит жыйынла аланы бийлегендиле. Социальный сетьледе адамла бир-бирлерин  не баллончукъла сатып алыргъа хауле итледен къалай къачаргъа, кеслерин къалай къорууларгъа юйретедиле… Сора шахар, эл администрацияланы таматаларын терслейдиле, бу хариплени орамгъа къыстагъанланы унутуп. Хау, юй жаныуарларын орамгъа атханла арабыздадыла. Аллай ишлени не штраф тёлегенлери жокъ, не бир жууаплыкъгъа тартылгъанлары жокъ.

Болум бек осал халгъа жетгенде, 2021 жылда Нальчикни мэри Таймураз Ахохов: «КъМР- ни Башчысы Казбек Коковну буйругъуна кёре 500 итге деп жарашдырылгъан энчи халлы юйню проектин хазырлагъанбыз», - деген эди. Алай бу къурулуш жеринден тебалмагъанды. Конкурс да бардырылгъанды, ахча да берилгенди, къурулуш а – жокъ. «Халкъ фронтну» келечилери бу кемчиликни ачыкълагъандыла, социальный сетьледе жазгъандыла, мэрияда сорууларына жууапла излегендиле. Специалистле айтханнга кёре, жер къурулушха келишмегени себепли, юйню  фундаментини тёгеригин да бегитирге тюшгенди, аны хатасындан иш созулгъанды. Бусагъатда  мында ишлерик специалистлеге  мекям хазырды. Саусуз итлени багъаргъа, аланы саулукълу тенглерин да тап тутаргъа онгла къуралгъандыла. Шахар администрацияда билдиргенлерине кёре, къурулушха къыркъ миллион чакълы бир сом къоратылгъанды, аны Ветеринарияны управлениясы бергенди, фундаментни тёгерегин а Нальчик администрация кесини ахчасына бегитгенди.

Мекям Нальчик шахарда Прохладненский орамдады, итлеге болушама дегенле бери аш келтираллыкъдыла. Баям, уллу шахарладача, ачыкъ эшиклени кюнлери къуралсала, адамла мында тургъан итлени юйлерине да алыргъа боллукъдула.

Байсыланы Марзият.
Поделиться: