Сабий поликлиникалагъа - жангы оборудование

Къабарты-Малкъарны сабийлеге бакъгъан учрежденияларына  76 миллион багъасы диагностика оборудование берилгенди. Ахча «Сабий поликлиникаланы бла больницалада поликлиника бёлюмлени ырысхы-техника онгларын кючлендириу» деген къырал программаны чеклеринде РФ-ни Правительствосуну резерв фондундан эмда регионну бюджетинден бёлюннгенди, деп билдиргендиле КъМР-ни Саулукъ сакълау министерствосуну пресс-службасындан.  
Саулай да бу жол  50 медицина оборудование алыннганды. Ол санда кёп функциялы багъыу-диагностика комплексле, стационар эм портатив  УЗИ аппаратла, анализаторла, офтальмология аппаратла, гастрофиброскоп, колонфиброскоп эм башхала.
Бюгюнлюкде Нальчикни 1-чи номерли поликлиникасында жангы техниканы хайырланып башлагъандыла. «Биз анализлени толуракъ тинтирге эмда тюз диагноз салыргъа онг тапханбыз. Бютюнда лор-комбайннге бла офтальмология оборудованиягъа къууаннганбыз», - дейди  учрежденияны баш врачы Мадина Кашежева.
КъМР-ни саулукъ сакълау министри Марат Хубиев, учреждениягъа берилген жангы оборудование бла шагъырейленнгенинден сора, программа юч жылны ичинде бардырыллыгъын айтханды. «Биринчи кере диагностика оборудование алгъанбыз. Келир жыл а сабий больницала башха  оборудование бла жалчытылынырыкъдыла», - дегенди ол.