Кредитле къалай къураладыла?

Россейни Финансла министерствосу, «Моифинансы.рф» проектини чеклеринде бардыргъан «Кредит математика: кредитле къалай къуралгъанларын билейик» деген битеуроссей онлайн-марафоннга къатышыргъа чакъырады барыбызны да. Ол 27 ноябрьде башланнганды, биринчи декабрьге дери барлыкъды, деп билдиргендиле Къабарты-Малкъарны Финансла министерствосундан. Проектни адреси: https://моифинансы.рф/kreditnaya-matematika-razbiraemsya-kak-ustroeny-kredity/.

Онлайн-марафонну баш темасы не бла байламлы болгъанын аны аты кёргюзтеди. Анда бу министерствону, Россейни Банкыны, Москваны финансла департаментини, НИФИ-ни эмда алчы банкланы келечилери кредитле неден къуралгъанларыны, къырал къатышып берилген льгота ипотеканы юслеринден айтырыкъдыла, хайырланыучу башын борчлагъа сукъмазча не зат этерге кереклисин да билдирликдиле.

«Эсеплеге кёре, кредит алгъанланы тёртден бирини юч неда андан кёп борчу барды. Аланы хар бешинчиси у а тёлеулерин заманында бералмай къыйналады. Кёбюсюнде ол адамны билими, кредитлени юсюнден ангылауу осал болгъаны ючюндю. Кёпле банк бла этген келишимлерин тынгылы окъумайдыла, башха финанс учрежденияланы кредитлерин тинтмейдиле, къолайлыкълары азайса, не зат этерге кереклисин да билмей, абызырайдыла. Инсанланы кёплери кредит каникулланы, рефинансированияны, реструктуризацияны юсюнден жукъ да эшитмегендиле. Биз аланы бу затлагъа юйретирге сюебиз, марафонну да  ол хыйсапдан  бардырабыз», - дегенди «Моифинансы.рф» проектни башчысы Михаил Сергейчик.

Алай бла анга къатышханланы видеолекцияла, тюрлю-тюрлю хайырлы материалла, ахырында уа тестле, саугъала эмда энчи сертификат алыр амаллары барды. Дагъыда регионланы арасында эришиуле бардырыллыкъдыла. Марафонну къурагъанла кредит неда ипотека темалагъа къайсы субъектледе жашагъанлада сейирлери уллуракъ болгъанын, лекциялагъа къайсылары кёбюрек къарагъанларын, сертификатланы да къайда асламыракъ алгъанларын туура этерикдиле. Хорлагъан регионну атын проектни ВКонтакте социал сетьде эмда Телеграмда каналында басмаларыкъдыла.