Кеслери иш къурагъанлагъа ахшы онгла

РФ-ни Экономиканы айнытыу министерствосуну эмда VK платформаны бизнесге себеплик этиу онгларын  энди кеслери иш къурап къармашханла да хайырланыргъа боллукъдула. Анга кёре аллай инсанла ишлерин айнытыргъа эки кереге кёбюрек ахча алаллыкъдыла, деп билдиргендиле Къабарты-Малкъарда «Мени бизнесим» арадан.

Бу акция 28 ноябрьде башланады, келир жылда апрель айны ахырына дери бардырыллыкъды кеси да. Аны кезиуюнде сагъынылгъан Арагъа (къайсы регионда сюйсегиз да) барып, энчи купон алыргъа керекди. VK платформада сатыу-алыу бал кюрешген предпринимательле анда реклама бергенлери ючюн 500-10000 минг сом тёлеселе, купонну хайырындан ол ахча эки кереге кёбейирикди. Башхача айтханда, ол социал сетьде эки кереге аслам реклама берирге онг береди. Продукцияларын сатыу неда жумушла бла жалчытыу бла кюрешген предпринимательлеге ол ахшы амал болгъаны баямды.

Арагъа бармай алыргъа да боллукъду купонну. Аны ючюн заявканы  бу сайтда къояргъа керекди: https://мойбизнес.рф/anticrisis/udvoenie-reklamnogo-byudzheta-na-platforme-vk-reklama/

«Предпринимательлеге таплыкъгъа деп бизни бла бирге быллай хайырлы программала бардырып башлагъанладан бириди VK. Алгъыннгы программабызны хайырын он минг чакълы организация эмда инсан кёргенди. Къайсы бизнесни да баш магъанасы – хайырлы сатыу-алыуду. Ансыз ишни къыйматы боллукъ тюйюлдю. Бу платформа уа, ол амал бла бирге, алагъа себеплик этерикди», - дегенди РФ-ни экономиканы айнытыу министрини орунбасары Татьяна Илюшникова.

Программаны чеклеринде дагъыда предпринимательлеге интернетде бизнесни айнытыу жаны бла билим берирге дейдиле. «Мени бизнесим» араны федерал сайтында сагъынылгъан министерствону эмда VK платформаны экспертлери вебинарла бардырадыла. Алада цифралы амалланы хайырланыуда ахшы сынамла бла шагъырейлендиредиле. Эфирлени кезиуюнде дагъыда магъаналы темаланы сюзедиле. Предпринимательле эмда кеслери иш къурап къармашханла, сёз ючюн, жангы алыучуланы къалай эмда къайда излерге кереклисин билликдиле, интернетде реклама берирге да юйренирикдиле.