Бирикдирген, жарыкълыкъ къошхан, кюч берген поэзия

Кёп болмай Къабарты-Малкъар къырал университетде «Точка кипения» деген аты бла назму жыйымдыкъ китапны презентациясы болгъанды. Анга  студентле, преподавательле эмда башхала къатышхандыла.

Китапны  авторлары уа  поэзия бирикдирген жерлешлерибиз: Нальчикни 14-чю гимназиясыны орус тилден бла адабиятдан устазы, «Школда къабарты-черкес тил бла  маданият» методика газетни редактору Фарида Кудаева, Бахсанны 8-чи номерли орта школуну директоруну  орунбасары, ингилиз тилден устаз Фатима Маржохова,  «Лескенская газетаны» таматасыны орунбасары Заира Хачетлова эм миллет кийимле тикген  белгили дизайнер Бэла Божоковадыла.

Тюбешиуде  Фарида Кудаева бла Фатима Маржохова кеслерини чыгъармачылыкъ ишлерини юсюнден хапар айтхандыла, бир къауум произведенияларыны жашырынлыкъларын да  ачыкълагъандыла эм китапларын  чыгъарыргъа излеген   жаш поэтлеге эсгертиуле этгендиле.

- Биз  бир бирибиз бла социал сетьлени хайырындан танышханбыз. Жыйымдыкъ китап чыгъарыр акъылгъа уа кесибиз да сунмай тургъанлай келгенбиз. Эм игиси, ол окъуучуланы сейирлерин  бурурча  болгъанды.  Мында назмула, башха чыгъармачылыкъ материалла да бардыла,- дейди  Фарида Кудаева.

- Назмула манга ич дуниямы ачыкъларгъа, кесими, жашауну юсюнден  сагъыш этерге   болушадыла. Хар адамны кесини жарсыулары барды, эртте-кеч болса да,  аллай кезиулеге жетмей къалмайбыз. Мен да аны кесими юсюмде сынагъанма, кёп заманны кесиме келалмай тургъанма. Манга поэзия болушханды деп таукел айталлыкъма, -  дейди Фатима Маржохова. 

Поэтле жыйылгъанлагъа назмуларын окъугъандыла, аланы оюмларына да тынгылагъандыла. КъМКъУ-ну орус тил бла битеулю тиллени билдириуден устаз  Башийланы Светлана  жууукъ заманда  алагъа жоралап   университетде семинар бардырыргъа чакъыргъанды.  «Импровизация» студент театр клубну таматасы, «Филология» бёлюмню магистратурасыны  биринчи курсунда окъугъан  Армине Каспарова уа  аланы чыгъармачылыкъларына кёре постановка салыргъа сюйгенин да билдиригенди.

Жарсыугъа,  китапны тюкенледе табарча тюйюлдю. Биринчи тираж бла чыкъгъан 300 китап  социал сетьледе окъуна   сатылгъанды. Алай къошакъ  халда энтта да басмалар умут барды. Аны презентациясы   4-7 сентябрьде КъМКъУ-да «Миллет технология башламчылыкъланы  платформасы»     къурагъан  «Точка кипения» КБГУ»  деген    стратегиялы сессияда ётерикди. Анга къыралны элли субъектинден аслам келечиле къатышырыкъдыла. 

 

Магометланы Сулейман.
Поделиться: