Ток бла тынгылы жалчытырча

Кёп  болмай «Россети Северный Кавказ»- «Каббалкэнерго» биригиуню келечилери «Водозабор» подстанцияны бир къауум  оборудованиясын жангыртхандыла.

Ишлени кезиуюнде специалистле  110/6 кВ кюч берген трансформаторну  6,3 башлап 10 Мвт. берирчасына   алышындыргъандыла.

Подстанция токну   асламысында нальчикчилени  таза суу бла жалчытхан станциялагъа  береди. Саулай алып айтханда,  аны хайыры бла 260 мингден аслам адамгъа ичер суу тапдырылады. Аны бла бирге Чегем районда да   бир къауум предприятие электрокючню мындан аладыла. 

 - Эски оборудование бюгюнлюкде сурамгъа келишмейди.  Жашау журтлагъа эм предприятиялагъа да дайым  къошула барады. Ол себепден ала ток бла сылтаусуз  болурча мадар излерге эм келир заманны да сагъышын этерге борчлубуз, - дейди  «Каббалкэнерго» биригиуню таматасы  Муртаз Каров.

Экономика айнырча 

Быйыл тогъуз айны ичинде «Россети Северный Кавказ» – «Каббалкэнерго» биригиуню келечилери  ара ток сетьлеге  сексенден артыкъ агропромышленный комплексни къошхандыла. Саулай алып айтханда, ала  7 мегаватт (МВт)  электрокюч бла жалчытылыннгандыла.

Жангы абонентлени санында тууарла тутхан фермала, терек бахчалыкъла  эм жемиш бла тахта кёгетле асыралгъан жерле да бардыла. Сёз  ючюн, Чегем районда онсегиз предприятие 2 МВт. къоратырыкъдыла, ол а аз тюйюлдю.

«Каббалкэнерго» биригиуню башчысы  Муртаз Каров  Къабарты-Малкъар терек бахчачылыкъ бла Шимал-Кавказ федерал округда биринчи жерни алгъанын эсге сала айта, аны бла байламлы жемишлени бла кёгетлени жарашдырырча, къышха  сакъларча комплексле да къуралгъанларын айтханды. Аланы ишлерине уа иги кесек ток изленеди. Болсада  биригиую келечиси  предприятияланы ток бла тынгылы жалчытыргъа эм экономиканы айныууна да  себеплик этерге хазырлыгъын билдиргенди.

Тёлегенлени санына къошулады

Быйыл тогъуз айны ичинде  «Россети Северный Кавказ» - «Каббалкэнерго» биригиуге  тёлемей борч этип тургъан   85,7 абонентни  ток ыздан кесерча тизме хазыр этилгенди.  Саулай алып айтханда, аланы берликлерини ёлчеми  2,03 миллиард сомгъа жетгенди. 

Чеклендириу ишни башлардан алгъа, биригиуню  келечилери  юй сайын барып, эсгериулени сансыз этиу неге келтирлигин ангылатхандыла. Алай бла, токсуз къаллыкъларын билип,  83,7 минг чакълы  абонент   борчларын жабаргъа ашыкъгъандыла. Аны хайыры бла  2,01 миллиард сом жыйылгъанды.

Айтылгъаннга эс бурмагъан хайырланыучуланы эки мингден артыгъыны   жашау журтларына баргъан ток ызларын кесерге тюшгенди. Бюгюнлюкде ала  жыйырма  миллион сом чакълы берирге керекдиле.
Электрокюч компанияны дауун къулакъгъа алмагъанны  отуз кюнню ичинде  иши сюдге берилирге боллукъду. Аллай адам,  борчун жапхандан сора да,  сюдню иши ючюн да  тёлерге тюшерикди. Эмда жангыдан токгъа  къошулама  десе,  юч минг сом  тёлерикди. 

Эсге сала айтсакъ, хайырланылгъан ток ючюн хакъны  айны онусундан кеч къалмай тёлерге тийишлиди. Аны бла бирге  ай сайын эсеплеген приборла кёргюзтгенни  суратха алып, аны юсюнден  23-26 кюнледе компаниягъа жиберирге керекди. Ол счётчикни ишлегенин  бла ишлемегенин билирге болушады. Бирде, юй бошуна тургъанлыкъгъа, ток ючюн квитанция келип, арада ангылаусузлукъ чыгъаргъа да   болады. Бир тюрлю сылтау бла  юйлеринден чыгъалмагъанла уа  «Россети Северный Кавказ» компанияны «СветОнлайн» къошагъы бла тёлерге боллукъдула.

Заманында этилген тёлеулени хайыры бла республиканы электрокюч бёлюмю ишин тынгылы бардырады, ол санда халкъны ток бла сылтаусуз жалчытырча эм аны качествосун ёсдюрюрча мадар этиледи.