Туристлени санына къошула барырча

Арт жыллада Шимал Кавказда, ол санда Къабарты-Малкъарда солургъа сюйгенлени санына танг къошула барады. Сёз ючюн,  быйыл жайда  былтырдан эсе 25 процентге кёп адам келгенди.   Тюзюн айтханда, юч айны ичинде регионну 600 минг турист жокълагъанды. Сегиз айгъа уа къонакъланы саны 1,1 миллионнга жетгенди. Аладан танг кесеги неда 740 минги Элбрус курортда кечиннгендиле.  

Турист  маршрутлагъа сурам уллулай къалады. Ол санда Чегем чучхурлагъа, Чирик кёллеге, Бызынгыгъа эм  башха жерлеге барыргъа сюйгенле кёпдюле.  Аны бла байламлы  тау  жолла къоркъуусуз болурча аслам эс бурулады.   Ол санда  «Экинчи Чегем-Булунгу» жолгъа да тынгылы ремонт этиледи. Ишле болжалдан кеч къалмай тамамланырларын республиканы Башчысы дайым контрольда тутады.  

Саулай алып айтханда, объектни уллулугъу 27 километрге жетеди. Алгъаракълада Чегем чучхурланы тийрсеинде эки километр чакълы бирде тийишли ишле толтурулгъандыла. Аны кезиуюнде суу таламазча, черек жагъаланы бетон къабыргъала къуюп  кючлегендиле эм жолну да иги кесекге кенгертгендиле.

Бусагъатда уа ишле Чегем чучхурланы бла   Булунгуну  арасында 25 километр тенгли бир жерде барадыла. Мында да  черек жагъаланы кючлейдиле, жардан таш, топуракъ оюлмазча мадар этиледи.   Ызы бла специалистле жолну мурдорун  жарашдырып, тротуарла салып, къоркъуусузлукъну жалчытырча аберилени да тохташдырып башларыкъдыла.

Къыйын тау жерледе  жолну ишлерге тынч тюйюлдю, болсада  организацияны келечилери борчларын болжалдан кеч къалмай толтурургъа кюрешедиле. Саулай алып айтханда, объектни 2026 жылгъа бошаргъа умутлудула.

Жарыкълыкъ кимге да тапды 

Къабарты-Малкъарда 2019 жылдан бери «Къоркъуусуз эм тынгылы автомобиль жолла» миллет проектге кёре 200 километр чакълы бирде  чыпынлы чыракъла тартылгъандыла.

Быйыл тийишли ишле  «Нальчик – Майский» жолда, ара шахарны  Мовсисян орамында бардырылгъандыла. Андан сора да, «Таза кёк» программагъа кёре, энтта да сегиз участокда неда онжети километр чакълы бирде чыпынлы чыракъла тартыллыкъдыла.

Жангы фонарьланы эски   ток  чыбыкъланы чыпынларына саллыкъдыла. Бюгюнлюкде ишлени бардырырча келишим этилгенди, жууукъ заманда ала башланырыкъдыла.

Алай бла миллет проектни эм башха федерал программаланы чеклеринде быйылны ахырына  90 километрде жолла жарыкъ болурча мадар этилликди.