«Севкаврентген-Д» заводха - 65 жыл

«Севкаврентген» къуру Къабарты-Малкъарда угъай, саулай Россейде, кёп къыраллада да белгили предприятияды. Ол 1958 жылда Майский шахарда ачылгъанды. Кеси да рентген оборудование чыгъарыу бла кюрешип тургъанды. Аны республиканы ара шахарында угъай, къыйыр тийрелеринде къурауну магъанасы жаш адамланы иш бла жалчытыу эди.

Предприятияда биринчи рентген аппаратны (РУМ-7) 1959 жылда чыгъаргъандыла. Аны ызындан келген жылда уа аллай 108 аппарат жарашдыргъандыла. Озгъан ёмюрню сексенинчи жылларында «Севкаврентгенни» продукциясын Совет Союзда, тыш къыраллада кёрмючледе да эслерге боллукъ эди.

Завод ишлеген кезиуде аны специалистлери 70 минг чакълы рентген оборудование къурагъандыла эмда чыгъаргъандыла. Союз чачылгъынчы дери аны продукциясын битеу республикалагъа, тыш къыраллагъа да жибере эдиле.

2008 жылда бу заводну аты «Севкаврентген-Д» болады. Анда энди шёндюгю диагностика оборудование эмда медицина устройствола чыгъарадыла, хар нени да жеринде жарашдырадыла. Предприятияны производстволу онглары иги да ёсгендиле.

Быйыл заводха 65 жыл толгъанды. Ол жылланы ичинде компания рентген диагностика эмда терапия оборудование чыгъарыу жаны бла Россейде тийишли жерин алгъанды. Бюгюнлюкде да ол айный барады, медицина учрежденияланы, стоматология клиникаланы, саулукъ сакълауну башха бёлюмлерин да техника бла жалчытады.

Былтырдан башлап завод «Урунууну къыйматы» миллет проектге къатышады. Анда ишде аяулу производствону технологияларын сингдиредиле, логистиканы, сатыуну, оноу этиуню да игилендиредиле.

Предприятияда оноучу эмда ишчи кадрланы билимлерин кючлендириу, аланы жангы затлагъа юйретиу программа да бардырылады. Анга Россейни Экспорт арасы, Промышленностуну айнытыу фонду да билеклик этедиле.

«Севкаврентген-Д» чыгъаргъан медицина керекле РФ-ни тийресинде этилген промышленность продукцияны реестрине киредиле. Ишде шёндюгю цифралы эмда инновациялы технологияла хайырланылгъаны себепли аланы качествосу да бийикди. Заводда оборудование уа тыш къыраллада быллай предприятиялада болгъанына бир жаны бла да оздурмайдыла.