Ыспас этип, жюрек ыразылыгъын билдиреди

Республикада жашагъан кёпле  бир-бир сылтаула бла  саулукъларына бакъдырыргъа, операция этерге башха шахарлада клиникалагъа барадыла. Анда  кеслерине къаратып, эс табып, саулукъларын игилендирип, жашаугъа ийнаныулукълары бла къайтханла да,  насыпха,  кёпдюле.

Аллайладан бири Черек районну  Къашхатау элинде жашагъан Ёлмезланы Шийихны жашы Къубадийди. Ол редакциягъа сёлешип, былай дегенди: «Бизни къайсыбызны да саулукъдан уллу  байлыгъыбыз жокъду, жарсыугъа, къаллай ауруудан да къутуллукъма  деген онг да. Алай бла саулугъубуз бизни къыйнап, жашауубузгъа  чюйре келе башласа уа олсагъат багъыу учреждениялагъа,  анда ишлеген врачлагъа чабабыз. Ала бизни терк окъуна  алгъыннгы жашауубузгъа  къайтарырла  деп къаты ышанабыз, ийнанабыз. Аладан себеплик сакълайбыз. Сёзсюз, бирде  уа  республикадан тышына барып, операцияны анда этдирирге да тюшеди. Насыпха, уллу Москвада  Къабарты-Малкъардан барып хирург, врач жашларыбызны бла къызларыбызны иги кесеги ишлейдиле. Ала  жерлешлерине не заманда да иги, къарындашларына, эгечлерине тюбегенча, кёз-къулакъ да боладыла. Аллай врачланы араларында Черек районну эллеринден адамла да бардыла.

Аладан бири – жюрек  къан тамырны ауруу  бла байламлы  операцияла этген хирург Астемир Ризуанович Каловду. Ол  ара шахарда Россейни  Саулукъ сакълау министерствосуну  А.Н.Бакулев атлы клиникасында жетишимли ишлейди. Иш а былай болгъанды: Лапин атлы клиникада Астемир Калов манга жюрегими  ишлегенин да тохтатмай, бек къыйын операцияны этгенди. Насыпха, ол жетишимли бошалгъанды. Жаш  Нартан элденди. Ма анга мен кесими жюрек ыразылыгъымы, уллу ыспасымы билдирирге сюеме, газетибизни юсю бла»,-дейди акъсакъал.

Астемир Ризуанович ишини устасыды, анга  ол Аллахдан келгенди. 2014 жылда Астемир  Россейни Халкъларыны шуёхлукълары университетини «Багъыу иш» деген бёлюмюн жетишимли бошайды. Андан сора эки жылны А.Н. Бакулев арада жюрек-къан тамырлагъа багъыу жаны бла «Жюрек-къан тамырла хирургия»  усталыкъ алады. Ызы бла аспирантурада да ол жаны бла  окъуп, билимин бютюн  бай этеди.

«Астемир Ризуановични бийик усталыгъыны,  адамлыкъ шартыны юсюнден   мен бирле айтып угъай, кесим кёзюм бла кёрюп, сынап билгенме.  Дагъыда къайтарып айтайым,  жашха ол усталыкъны Аллах кеси бергенди. Аны бла бирге уа ол бек эсли, башханы жарсыууна  эс буруп, жюрек аурута билген да адамды.  Аллайланы юсюнден: «Адам кеси жеринде»,- деп айтадыла. Ишлеген жылларыны ичинде, ол  саусузларындан огъурлу, жюрекден баргъан сёзлени кёп кере эшитгенине сёз да жокъду. Алагъа мен да къошулама. Астемир Каловну аллында баш ура, анга  жюрегимден ыспас этеме. Аны адамлагъа болушлукъ этиуде, не заманда да кючю–къарыуу, жюрек талпыныуу да  таркъаймасынла»,-дейди  хирург жерлешибизге  акъсакъал Къубадий.

«Лапинода» саулугъуна бакъдыра тургъан кезиуде  Ёлмезланы Къубадий госпитальны битеу коллективи бла шагъырейленнгенди.  Ол айтханнга кёре,  анда  жюрекге  бакъгъан бёлюмде  ишлеген врачланы барысы да бир кибик  игиледиле, эслиледиле. Алагъа башчылыкъны уа бизни дагъыда бир жерлешибиз  медицина илмуланы кандидаты Альберт Амалиевич Ахобеков этеди. Аны да иш сынауу уллуду. Ол да кёплеге жашаугъа  ийнаныулукъ берип келеди.

Черек районда жашап,  Альберт Ахобековну эмда  Астемир Каловну   къолларына тюшюп, саулукъларын игилендирген барыны да атындан Къашхатау элде жашагъан  акъсакъал жюрек ыразылыгъын билдире, ала не заманда да болушлукъ этерге келирге хазырлыкълары ючюн сау болугъуз  дейди. Аны бла бирге уа бу алтын къоллу хирурглагъа жюрек ырахатлыкъ, юйюрлеринде тынчлыкъ да тежейди.

Холаланы Марзият.
Поделиться: