Сабийликни жарыкъ этген байрам

«Ашхана» проектни бардыргъан Мокъаланы Гульнара сабийлени  айныуларына  жарагъан  кеп  сейир жумушла  къурайды.  Бу  кюнледе  да    «STARTUM» сабийлеге билим берген  арада   мастер-класс  болгъанды. Ары отуздан  аслам  бала  къатышханды,   эм гитчечикге уа  юч  жыл  бола эди.  Аланы санында  белгили  жырчыбызны  Тёппеланы  Алимни да  къызчыкълары  бар эдиле.

Жыйылыуну  аллында  барысына да    ариу  тюрсюнлю  ал ботала  кийдирип,  бир  бирлери  бла  танышдыргъандыла.  Ызы  бла хар бирине  да эришиуге  керек  затланы  берип,  мастер-классны  башлагъандыла.  Сабийлеге  кёп  сейир  жумушла  буюргъандыла.   Эм алгъа,  зараны  болмагъан  бояула  бла  татлы  ашарыкъланы юсюнде  кеслери  не  зат  сюйселе  да  ишлерге.  Аны  бла  сабийлени  фахмуларын,  оюмларын  да  тинтгендиле.  Хар  бири  да  кеси  жаратханча,  жазыула,  ариу  затла  ишлегендиле. Иги этгенлери  ючюн хар  бирине  да  саугъала  да  бергендиле.

   Ызы  бла   экинчи  жумушну  башлагъандыла. Анда сабийле  кёк,  сары,  мор,  жашил, къызыл  тюрсюнлю  тылы  бла  ишлегендиле. «Мен  тылыгъа  тюкенледе  сатылгъан  бояуланы  къошмайма.  Сабийге  зараны болмазча,  хар  тюрсюнню да  кесим хазырлайма.  Сез  ючюн,  къызыл  тюрсюнню  чюгюндюрню  сууундан,  жашилни - шпинатны сууундан,  сарыны - куркума  къошуп.  Аны  гитчеле ашасала  да,  аллергия  болмайдыла»-, дегенди  Гульнара. 

Ызы  бла  сабийле  «STARTUM» араны  логотипин  этгендиле. Анда  сары  бла  кёк  тюрсюнлю  адамчыкъла  ишленипдиле,  аланы  кеслерини  къарамларына  кёре жарашдыргъандыла.  Бир-бирле  уа  жыл  санлары  аз  болгъанлыкъгъа,  аны  аламат  келишдиргендиле.  Эм  ариу  этгенледен  бири уа  хасаниячы  къызчыкъ Бёзюланы  Зухра  болгъанды.  Ол  буюрулгъан  жумушну  кеси  аллына  аламат  хазырлап сейирсиндиргенди.

Ызы бла  ючюнчю  жумушха  кёчгендиле.  Анда уа сабийлеге  сюйген  персонажны - «Чебурашканы» - ишлерге  буюрулгъанды.  Ала  анга да къууанып,  эришип  ишлегендиле. Аллай  жаныуарчыкъны  кёпле жаратханы себепли   ариу  этгенле  аз  болмагъандыла.  Аланы  тамамлагъан  ишлерин а  араны  директору да Зубайда  тинтгенди.  Сабийле  кёллерин  салып,  аламат  кюрешгенлерин  бек  къууаннганын  айтханды.   Быллай  жумуш  гитчелени  оюмларын, моторикаларын  да  иги ишлетгенин  да  чертгенди.  Дагъыда  гитчеле  бир  бирлери  бла  танышып,  кёллери  жарыкъ  болгъаныны  багъасы  жокъду, дегенди  ол.

 Сабийле  хар  бири  да  кесини  иши  бла  танышдыргъандан  сора,  бирге ойнап,  татлы  ашарыкъла  бла  сыйланнгандыла.  Ызы  бла уа Мокъаланы Гульнара, хар  бирине  да  иги  кюрешгени  ючюн ыразылыгъын  айтып,  сыйлы  грамотала  бла  саугъалагъанды.  

Темуккуланы Амина.
Поделиться: