Юч мингден аслам адам саулукъларын кючлегендиле

Къабарты-Малкъарны Курортла эм туризм министерствосуну келечилери солуу эм саулукъну  кючлеу  халны дайым тинтгенлей турадыла, бу жол ала «Маяк» санаторийде болгъандыла.

Санаторий «Долинск» курортну арасында эрттегили тарых магъаналы мекямда орналыпды, анга ашхана, эки къатлы корпус, административ отоула эм гара сууу бла ачыкъ бассейн киредиле. Бир кереге анда 180 адам саулукъларын кючлерге боллукъдула, алагъа къарарча да 65 инсан ишлейдиле. 

Мында санатор-курорт багъыуну кёп тюрлюсю тамамланылады – ингаляцияла, фито эм аромотерапия, багъыу балчыкъ, гидротерапия, массаж, физкультура, физиотерапия этиледиле. Ала барысы да, адамлагъа таплыкъгъа, бир мекямда орналыпдыла. Мында чекленнген онглары болгъан инсанлагъа да битеу онгла къуралгъандыла. Дежурный тургъан жерде терк болушлукъ чакъырырча кнопкала, пандус бла коляска бардыла. Ашханада энди диетагъа кёре ауузланнганлагъа излемлерине кёре ашла этиледиле.

2023 жылны аллындан башлап «Маякда» Росейни 12 регионундан 3149 адам саулукъларын кючлегендиле.