Аслам контрактха бла келишимге къол салыннганды

Алгъаракълада ара шахарыбызда  Сколково илму эм технологияла институтда битеуроссей билим бериу  «Остров 10-22» атлы интерсив ётгенди. Аны эсеплерине кёре, Къабарты-Малкъар къырал университет къыралны алчы вузлары эмда илму-билим бериу аралары бла аслам контрактха къол салыу жаны бла алчыланы санына къошулгъанды. КъМКъУ-да ётген конкурсну эсеплерин чертип, анда къурашдырылгъан цифралы тюрлениулени концепциясын жарашдырып башлагъандыла.

Интенсивни баш магъаналы темасы шёндюгю билим бериу системада технологияланы терк атламлары,  цифралы тюрлениуле бла къыралны вузлары къалай хайырланыргъа боллукълары эди. Анга къыралны жюз вузундан 4,5 минг адам, 16 илму-билим бериу ара, 14 россей стартап къатышхандыла.  Эки минг илму-билим бериу эм маданият-жарыкъландырыу тюбешиуле, 370 мастер-классла, 95 лабораторияда юйретиу-сынау дерсле бардырылгъандыла. Дагъыда Россейни, АБШ-ны, Англияны, Индияны, Францияны, Бельгияны, Израильни алчы алимлери, бизнесменлери эм къырал властланы келечилери башында айтылгъан темагъа къыркъ лекция окъугъандыла.

«Келир заманны биз бирге къурайбыз. Барыбыз да жангы билим бериу система жарашдырыргъа, аны илму экономика сектор этерге итинебиз. Бу конкурс жангы инновациялы экосистеманы къураууну бир бёлюмюдю, ол а «Илму» эм «Билим бериу»  миллет проектлени  бардырыугъа уллу болушлукъду. Дагъыда бу конкурсну хайыры недеди десегиз, ол цифралы экономикада бийик квалификациялы кадрланы хазырларгъа, жангы технологияланы хайырланыргъа онгла береди», - дегенди РФ-ни илму эм бийик билим бериуню министрини биринчи орунбасары Григорий Трубников.

РФ-ни Президентини цифралы эм технология айныу жаны бла энчи келечиси, «Жаш профессионалла» стратегиялы башламчылыкъланы агентствону таматасы Дмитрий Песков конкурсха къатышханлагъа юйретиу сёзле айтханды: «Биз бирге билимибизни сынайбыз мында. Аны тюз хайырланырча, бек биринчиден, сиз, шёндюню  угъай, боллукъ заманны юсюнден сагъыш этерге керексиз. Экинчиден, къауумугъуз бла бирча оюм да, сагъыш да этерге. Ючюнчюден, баям, баш магъаналысы бу болур, башханы халатын кёрюп кесигизни кётюрюрге кюрешмегиз. Бир бирге болушургъа итинигиз».

Конкурсха къатышханланы шёндюгю технологиялада цифралы экономиканы излемлерине кёре билим бериуню процессин жарашдырыргъа, специалистле хазырларгъа, регионда жангы бизнес, проектле жарашдырылырча  экономика система къурашдырыргъа юйретгендиле. 

КъМКъУ-ну командасын энчи белгилеп айтырчады. Интенсивде аладан тири эм мадарлы болмагъанды – Россейни алчы вузлары эм илму-билим бериу аралары бла 156 контрактха  бла келишимлеге къол салгъандыла. Алада энчи эс Миллет технологиялы инициативасыны  Technet and Healsnet эм EduNet рынокларына  университетни студентлери бла алимлери хазырлагъан проектлени жарашдырыугъа, регионубузгъа инвестицияла тартыугъа, цифралы экономикагъа кадрла хазырлаугъа, компьютерли инжинирингге, информациялы къоркъуусузлукъгъа, медицинада информациялы технологиялагъа эм аддитив технологиялагъа берилгенди.

Хар кюнден бийик билим бериуде цифралы тюрлениулени проблемалары бла байламлы вузланы ректорларыны тюбешиулери бардырылгъанлай тургъандыла. Алагъа бизни командабызны башчысы КъМКъУ-ну ректору Юрий Альтудов тири къатышханды. 

Алгъаракълада КъМКъУ-да «Точка кипения» аты бла илму-билим бериу эм сынау ишле бардырыу майдан ачылгъан эди. Анда жаш алимле бла студентле  НТИ-ни рыногуна 8 проект хазырлагъандыла эмда Миллет технология башламчылыкъла бёлюмде тири къармашып, ахшы эсеплери ючюн Москвада бардырылгъан интенсивге чакъырылгъандыла. 

Сентябрьни ал кюнлеринде университетде НТИ-ни жолунда билим бериуню цифралы  тюрлениулерини программасына къатышхан бийик билим бериу учрежденияланы федерал даражада стратегиялы сессиясы ётерикди.

ТОКУМАЛАНЫ Салим.
Поделиться: