Сиз а къалай сунасыз?

Къырал Думаны къараууна школда дерслени кезиуюнде окъуучулагъа телефон бла кюреширге къоймазгъа деген законну проекти берилгенди. «Устазла битеулю билим бериу программаны толтургъан кезиуде чырмаула болмаз ючюн, дерследе окъуучулагъа телефон бла хайырланыргъа жарамайды», - деп айтылады документни ангылатыу кесегинде.

Жаланда окъутуу программаны толтурургъа телефон керек болса, неда сабийни жашаууна къоркъуулу болумлада къоярыкъдыла телефон бла хайырланыргъа.

Законопроектни авторлары айтханларыча, документ устазны даражасын ёсдюрюуге бурулупду. Анда школну оноучулары устазны окъуучу низамны, дерсни барыуун бузгъанына тарыгъыуларын тинтирге борчлу болгъанлары да белгиленеди.

Бу башламчылыкъгъа инсанланы кёз къарамларын билир мурат бла Къырал думаны башчысы Вячеслав Володин Телеграмда кесини бетинде соруу башлагъанды. Бу материал хазырланнган кезиуде анда 272,7 мингден аслам адам къол кётюргенди, аладан 84 проценти бу оноу жанлы болгъанларын билдиргендиле.

Башламчылыкъгъа оюмла  тюрлю-тюрлю болгъандыла. Бирлери цифралы амалла сингдирилген кезиуде телефонну къоймагъан окъутуугъа чырмау боллугъун жазадыла. Башхалары уа  сабийлени кеслерини оюмлары болмагъанын, ала дерсни Интернетден кёчюрюп къойгъанларын, сагъыш эте билмегенлерин, билимни качествосу тюшгенин жазадыла. Ючюнчю къауум а, оноуну терслигин белгилеп, дерсни кезиуюнде устаз окъуучуну эркинликлерине бузукълукъла этсе, ол ачыкъланмай къаллыгъына жарсыгъанларын билдиредиле.

Кертиди, бу сорууну бир жууабы жокъду. Сиз а къалай сунасыз, дерсни кезиуюнде окъуучугъа телефон бла кюрешген хайырмы, хатамы келтиреди?

 

Тикаланы Фатима хазырлагъанды.
Поделиться: