Халкъны бирлигини кюнюнде байрам жумушла битеу субъектледе боллукъдула

«Единая Россия» битеу къыралда да Халкъны бирлигини кюнюнде байрам жумушланы бардырлыкъды. Партияны келечилери фестивальла, автопробегле, энчи аскер операциягъа къатышханлагъа бла аланы юйюрлерине  жандауурлукъ ишле къурарыкъдыла.

«Единая Россияны» жанлыланы жамауат штабларында, ала уа 28 регионда ачылгъандыла, «Россей – бир юйюр»  акция башланнганды. Аны чеклеринде кёп сабийли юйюрлеге бла СВО-гъа къатышханланы юйюрлерине саугъала жыядыла. Ала уа регионда чыгъарылгъанларын эмда анда жашагъан халкъланы энчиликлерин ачыкълагъанларын айтырчады. Ызы бла субъектле саугъала бла алышынырыкъдыла.  

 Сёзге, Ханты-Мансийскден Луганск халкъ республикагъа бла Хакасиягъа татлы ашарыкъла бла саугъаланы ашыргъандыла: ягель бла шоколад, наныкъдан мармелад, къызыл ишхилдиден эм къуру бу регионда ёсген башха жилекден мырзай.

 Штаблада дагъыда регионну миллетлерини ашларын хазырлаугъа юйретиу дерсле,  Россейни халкъларыны фестивальларын, суратланы кёрмючлерин къураргъа да белгиленеди. Алада уа къыралны ахыр жыллада жетишимлерини юсюнден хапарланырыкъды: къыш Олимпиададан башлап, Кърымны, Севастопольну, ЛДНР-ни, Запорожье эм Херсон областьланы Россейге къайтханларына дери.

 Москвада партияны келечилери  къыралны миллетлерини ашларын хазырларыкъдыла, Богородскда уа аланы СВО-гъа къатышханла кеслерине бакъдыргъан госпитальгъа элтирикдиле, Луховицде  уа ала бла сабийлени сыйларыкъдыла.  

Ивановода «Кишиликни бла батырлыкъны кубогу» ючюн эришиуле боллукъдула. Ала быйыл экинчи кере къураладыла эмда энчи аскер операцияда жанларын берген аскерчилени хурметине аталадыла. Каратеден эришиулеге къыралны 11 регионундан 300-ден аслам спортчу къатышырыкъды. Эришиуле, ГТО-ну фестивальларын, зарядкаланы Къабарты-Малкъарда, ДНР-де, Башкъортостанда, Тамбов эм Липецк областьлада бардырыллыкъдыла. Анапада уа партия «Халкъланы шуёхлукълары» жаш тёлю фестиваль къураллыкъды.

 Краснодар крайны единоросслары   СВО-гъа   200 тонна жандауурлукъ жюк берликдиле эмда Новороссийскде госпитальда кеслерине къаратхан аскерчилени жокъларыкъдыла.  Донецкде  аскерчилерибизге керекли затлары бла посылкала берилликдиле. Бу акция башха жерледе да бардырыллыкъды:   Шахтерскде, Макеевкада, Харцызскде, Докучаевскде эм Снежноеде.

  «Единая Россияны»   Тульск  областьда волонтёрлары Мариупольну Левобережный районунда боллукъдула.  Ала шахарны искусствону 3-чю номерли  школуна чыгъармачылыкъ бла кюреширге кереклени саугъаларыкъдыла.  Дагъыда тулачы къурулушчула ишлеген сабий садны жокълап, къызчыкълагъа бла жашчыкълагъа татлы ашарыкъланы эм «Донбассха – китапла» акцияны кезиуюнде жыйылгъан саугъаланы берликдиле. Кёп сабийли юйюрлеге да барыргъа белгилейдиле партияны келечилери. Алагъа 100 килограмм татлы саугъа хазырланнганды.

Пятигорскда партияны эм «Волонтёры-медики» къымылдауну келечилери бла шахарчыла «Россей – бизбиз» акциягъа къошуллукъдула. Анда къуралгъан дерследе жууунургъа керекле, чурукъланы къургъасытырча затла хазырлап, аскерчилерибизге ашырлыкъдыла.

«Единая Россия», «Жаш тёлю гвардия» эм «Хорламны волонтёрлары» Нижний Новгородда Россейни жюзметрлик байрагъын жаярыкъдыла. Дебальцевода (ДНР) «Тарых эсде тутуу» партия проектни чеклеринде  флешмоб боллукъду. Анга къатышханла уа ДНР-ни байрагъын къурарыкъдыла , ызы бла уа аны Россейни байрагъына тюрлендирликдиле.

«Единая Россияны» КъМР-де регион бёлюмю да Халкъны бирлигини кюнюне бай программа хазырлагъанды, деп билдиргенди партияны регион бёлюмюню секретарыны орунбасары, волонтёр штабны таматасы Дмитрий Парафилов   KABARDIN-BALKAR.ER.RU сайтны журналистлерине.

- Битеу муниципал къуралыулада партияны бёлюмлери байрамла бардырлыкъдыла: районланы чыгъармачылыкъ къауумларыны къатышыуу бла  концертле,  суратланы эм халкъ чыгъармаланы кёрмючлерин, эришиуле, ачыкъ дерсле. Дагъыда къыралны жангы инсанларына паспортла бериуле да боллукъдула. Жандауурлукъ иш бардырыргъа да белгиленеди. Аны кезиуюнде уа партияны келечилери, къолайсыз юйюрлени жокълап, алагъа аш-суу хуржунла берликдиле. Энчи аскер операциягъа къатышханланы юйюрлери бла да бардырыллыкъдыла байрам жумушла,-дегенди Дмитрий Парафилов.