Адамланы жашауларын игилендирирге къайгъыргъанды

Тырныауузда бла Минги тауда граждан эм промышленный объектлени къурулушларында уруннган, таулу жерни айныууна уллу къыйын салгъан адамланы араларында Ризаланы Саладинни сагъыныргъа тийишлиди. Кёп жылланы бет жарыкълы ишлегени эм къурулушха этген уллу къошумчулугъу ючюн республиканы Башчысыны буйругъу бла анга 2019 жылда «Къабарты-Малкъарны сыйлы къурулушчусу» деген ат берилгенди.

Саладин Магомедович Ставрополь крайны Кисловодск шахарында туугъанды. Школдан сора Къабарты-Малкъар къырал университетни инженер-техника факультетине киргенди, аны 1971 жылда тауусханды. Инженер-къурулушчу деген усталыкъны алып, 20 жылны ичинде Тырныауузда бла Элбрусда уруннганды. Ал кезиуледе прораб, артда 9-чу номерли къурулуш управленияны баш инженери, ызы бла уа ол кезиуде «Каббалкпромстрой» трестни эм уллу бёлюмю – 1-чи номерли къурулуш управленияны башчысы болгъанды. Бир ауукъ замандан Саладин Магомедовични «Тырныаузстрой» къурулуш-монтаж трестни управляющийине салгъандыла, организация административ участкада къурулушну саулай да бирикдиргенди: анга 1-чи, 8-чи, 9-чу эм 10-чу управленияла, 3-чю номерли темир-бетон завод, 6-чы автотранспорт мюлк, ишлени механизациялау жаны бла управление, адамла жашагъан юйле, сабий садла бла жашау журт-коммунал мюлк киргендиле. Трест районда жангы подряд организация болгъанды, Россейни Югунда эм уллугъа саналгъанды.

Тырныауузда, Минги тауда да Ризаланы Саладинни башчылыгъында эм аны къатышыуу бла ишленнген объектлени санап чыкъгъан къыйынды. Араларында жашау журтла, мектепле, сабий садла, социал-турмуш эм маданият мекямла, «Кругозор» станциядан башлап «Мирге» дери маятник канат жол, «Мирден» «Гарабашиге» дери канат-кресель жол, «Чегетге» кресель жол, «Чегет» бла «Вольфрам» къонакъ юйле, Адыл-сууда ЦК КПСС-ни ишлери жаны бла управленияны пансионаты, СССР-ни Саулукъ сакълау министерствосуну 4-чю Баш управлениясыны пансионат-санаторийи, Терскъолну башында астрономия обсерватория, Москваны Бауман атлы къырал техника университетини «Джантуган» спорт-саулукъ кючлеу лагери, Нальчик-Тегенекли станция эм башхала бардыла.

Саладин Магомедовични Тырныауузну шахар советини халкъ депутатына кёп кере айыргъандыла, ол шахарны Директорларыны советини таматасы да болгъанды. Жамауат орган жер-жерни айнытыуда предприятияланы бла организацияланы онгларын къалай хайырланыргъа боллугъун тинтгенди, шахарда эм элледе жашагъан адамланы хазналарын игилендириуню амалларын излегенди. Аны къауумуна вольфрам-магъадан комбинатны, низковольтный аппаратура чыгъаргъан заводну, къурулуш бёлюмлени, «Былымский» совхозну, продснабны, шахар больницаны, Туризм эм экскурсияла жаны бла район советни, «Приэльбрусье» миллет паркны бла башха организацияланы таматалары бла баш специалистлери киргендиле.

Ризаланы Саладинни иги таныгъан адамла чертгенлерича, Тырныауузда уруннган кезиуюнде ол адамланы жарсыуларына, кереклерине къайгъыргъанды, къолайлары аз инсанлагъа болушургъа кюрешгенди, ол санда къурулуш материалла да берип. Саладин Магомедович абадан адамлагъа уллу жылыулукъ бла къарагъанды. Районну аллында энчи къыйыны ючюн анга «Элбрус районну сыйлы гражданини» деген ат берилгенди, саугъаларыны араларында СССР-ни Ауур индустрия  предприятияланы къурулушлары эм Юг регионлада къурулуш бардырыу жаны бла министерстволарыны сыйлы грамоталары бла дипломлары бардыла. Риза улу, Нальчикге кёчгенинден сора да, ишин къурулуш жаны бла тюрлю-тюрлю къуллукълада бардыргъанды.