Жаш тёлюню тамблагъы кюнюне къайгъыра

«Азимут» къонакъ юйню  конференция залында «Къыралыбызны тёрели тин-ниет байлыкъларын сакълау» деген ат бла конференция бардырылгъанды. Аны  «Дружный Кавказ» жаш тёлю клуб бардыргъанды.

Бу жумуш бизни республикада Шимал Кавказны муслийман   Координация арасыны себеплиги бла КъМР-ни  Муслийманларыны дин управлениясы бардыргъанды.

Жыйылыугъа Шимал Кавказны башха республикаларындан да къонакъла къатышхандыла. Аланы араларында Ставропольну муфтиятыны келечиси Мурад Ибрагимов,  Къалмукъ Республиканы муфтиятыны келечиси Раджаб Зияутдинов,  КъЧР-ни  медиресе интернатыны директору Эркенланы Магомед,  Чечен Республиканы муфиятыны келечиси Супьян Курбанов, РСО- Алания республиканы муфтиятыны келечиси Батраз Аршиев,  Адыгея Республиканы  муфтиятыны келечиси Азрет Хуштов,  КъМР-ни Жаш тёлюню ишлери жаны бла министри Азамат Люев эм  жаш тёлю да къатышхандыла.

Клуб 2019 жылда къуралгъанды. Аны баш мураты жаш тёлюню тюз жолгъа салыргъа, бир бирге жарыкъ болургъа юйретиргеди. Ол кеси да жыл сайын хар республикада да бардырылгъанлай турады.

Бюгюн анда кёп керекли жумушланы сюзюп, тинтгендиле. Мындан ары жаш тёлюге къаллай себеплик этерге кереклисин белгилегендиле. Андан сора да шёндюгю жашауда магъаналы болумланы юслеринден да айтхандыла.

Келгенлеге   КъМР-ни Муслийманларыны дин управлениясыны председатели, муфтий Хазраталий Дзасежев ыразылыгъын билдиргенди. 

-Бюгюн бери кёп адам келгенди. Бу форумну бардырылгъаны иги шартды. Нек дегенде биз жаш тёлюбюзге тюз жолгъа турурча, аман затлагъа юйренип, жашауларын бузмазча амалла этерге борчлубуз. Дагъыда бизде Шимал Кавказда кёп миллетле,  башха динлени тутхан адамла да бардыла. Ала бла  бирликде жашаргъа юйретирге керекбиз.  Жаш тёлюню арасында тюйюшле не бла байламлы болгъанын чертип, амалла излерге борчлубуз. Жауларыбыз жаш тёлюню арасын бузаргъа амал излегенлери да баямды. Бюгюн сабийлени тюз жаны бла юйретсек, аланы, бизни да тамблагъы жашауубуз тынч боллукъду, - деп чертгенди ол.

Къарачай-Черкесни муфтиятыны келечиси  Эркенланы Магомед кёп жылланы  медиресе-интернатны башчысы болуп ишлегенин айтханды.  Эм алгъа, ала жаш тёлюню бир бирлерине хурмет берирге юйретгенин белгилегенди. Быйыл  медиресеге алтмышдан аслам сохта келгенди.  Ары жангыз КъЧР-дан угъай,  къабартылы, таулу, чеченли, дагъыстанлы, ингушлу сабийле да келгенлерин билдиргенди ол. Ала бир юйюрча тургъанларына бек къууаннганын да айтханды. 

-Биз неден да бек динибизге, тилибизге сакъ болургъа керекбиз.  Кавказда жашагъан миллетлени кёбюсюню санлары азды.  Тил тас болса уа, миллет да къуруп къаллыкъды. Аны ючюн жаш тёлюню тилин сакъларгъа итиндиргенлей турама. Ислам дин да тилибизни сакъларгъа чакъыргъанын ангылатама, - дегенди Эркен улу. 

Андан сора да, кёп сейир затланы ачыкълагъандыла ол жыйылыуда.  Ставрополь крайны  муфтиятыны келечиси Мурад Ибрагимов Пятигорск шахарны къырал университетинде окъутады. Анда жаш тёлюню тюз жолгъа юйретирча кёп лекцияла бардыргъанын айтханды. Бу форумну да уллу  себеплиги болгъанын чертгенди.

 Бир жылны ол Америкада университетде ишлеп тургъанды. Нью-Йоркда  байрым кюн анда жашагъан муслийманлагъа азан окъулурча амал этилгенин да айтханды.  Кюнбатыш жерледе политикле жаш тёлюге уллу эс бурмайдыла, диннге эс бурулса да сюмейдиле. Ол а анда жашагъан жаш тёлюню бек бузгъанын чертгенди.  Андан сора Российни Президенти Владимир Путин къыралыбызны тин-ниет тёрелерин сакълау   бла байламлы  указ чыгъаргъанына ыразылыгъын да билдиргенди. 

Адыгеяны муфтиясыны келечиси Азрет Хуштов  жаш тёлюге кюнбатыш къыралланы  диннге къажау сюелгенлерин, аны бла къалмагъанлай, къыралыбызгъа хата келтирирге амалла этгенлей тургъанларыны юсюнден айтханды.

-Бусагъатда интернет бла, жарсыугъа,  кёп аман затлагъа къараргъа  амалла бардыла.  Кюнбатыш къыралла адамгъа, жаш тёлюге динни тутаргъа, сагъыш этерге да керек тюйюлдю, деген оюмну кенг жаядыла.  Эм алгъа не затны юсюнде да  эркинлик керекди, деп юйретедиле. Ол сагъышланы уа жангыз кеслеринде жашагъанлагъа угъай, бизни къыралда, ислам динни тутхан къыраллагъа да сингдирирге кюрешедиле.  Алай, адам сагъыш этмегенлей, Аллахдан къоркъмагъанлай, эркинликге ычхыннган аман затлагъа келтирип башлагъаны баямды. Эркинлик деп ала  жашны къыз боллугъу келе эсе, ол аны эркинлигиди, деп айтадыла. Къыз да жаш болургъа сюйсе, тюз ол халли.  Алай ол адамны жашауун, саулугъун да бузуп къойгъанын а айтмайдыла. Аны себепли  мында жыйылгъан жаш тёлюге да айтама, хар форумлада да белгилейме. Сыйлы китабыбыз эм биринчи  «Окъу» деген сёзден башланады.  Ол да бошдан жазылмагъанды эм биринчи. Бизни жамауатыбыз, жарсыугъа, окъумайды, интернетге берилип, керекли, билим берген, тюзлюкге юйретген китапла бла хайырланмайды. Аны ючюн барыгъызны да чакъырама, къыралыбызны, динибизни да сакълар ючюн, окъугъан этигиз, - дегенди ол.

Форумну ахырында къонакъланы хар заманда да келип,  Къабарты-Малкъар республиканы айныууна себеплик этип тургъанлары ючюн Хазратали Дзасежев уллу ыспас этип, сыйлы къагъытла бла саугъалагъанды.          КъМР-ни Жаш тёлюню ишлерини жаны бла  министр Азамат Люев да келгенлеге хурмет этгенди,  барыбыз да бир болуп, жаш тёлюню тамблагъы кюнюн ариу болурча амалла къураргъа керекбиз, дегенди. Дагъыда Хазратали Дзасежевни не заманда да жаш тёлюге керек жумушлада артха турмагъанлай амалла этип, болушуп тургъанына ыразылыгъын  айтып,  сыйлы къагъыт бла саугъалагъанды.