От ёчюлтюучюледе къонакъда

Сабийлени от ёчюлтюу-къутхарыу бёлюмлеге къонакъгъа чакъырыу ахшы тёреге айланнганды, бу жол Нарткъаланы биринчи лицейини окъуучулары бешинчи номерли къутхарыу бёлюмде болгъандыла. 

 От ёчюлтюучюле гитчелеге ишлерини юсюнден айтхандыла, къоркъуусузлукъну жорукъларын, от бла ойнаргъа жарамагъанын эсгертгендиле. Ызы бла уа бёлюмде экскурсия къурагъандыла. Аны кезиуюнде сабийле энчи составха къаллай борчла салыннганларын, дежурный къарауулну ишини юсюнден билгендиле. Эм сейир а от ёчюлтюу техника кёрюннгенди, гаражда ала къутхарычуланы машиналарына къарагъандыла, энчи оборудование бла – кенгертиучюле, гидроцилиндрле, къыптыла, бензорезле эм башха керекле – шагъырейленнгендиле. Хар замандача, от ёчюлтюучюлени кийимлерин кийип, оборудованияны да алып, жалгъан отну ёчюлтюп да ойнагъандыла. Алай бла тюбешиу зауукълу ётгенди, окъуучула уа, ёсгенлей, къутхарыучула болургъа сюйгенлерин айтхандыла.