Киров область бла байламлыкъла къурай

Къабарты-Малкъарны бла Киров областьны арасында байламлыкъла къурар умутда бизни республикадан къырал къуллукъчуланы къаууму ол регионда болгъанды. Делегациягъа Правительствону Председателини биринчи орунбасары Сергей Говоров, табийгъат байлыкъла эмда экология министр Шауаланы Илияс, къурулуш эмда ЖКХ министр Алим Бербеков, курортла эмда туризм министрни орунбасары Шауаланы Ислам киргендиле.

Ала Киров областьны губернатору Алексей Соколов бла тюбешгендиле. «Биз Петербургда ётген халкъла аралы экономика форумну кезиуюнде арада байламлыкъла къурауну юсюнден келишим этген эдик. Ол къыйматлы болуруна ишексизме. Бизде биотехнологияла, химия промышленность, машинала ишлеу эмда металлургия айныгъан бёлюмлеге саналадыла. Талай тюрлю продукция чыгъарыу жаны бла уа саулай къыралда окъуна ал жерни алабыз. Аны себепли промышленность сферада бирге ишлерге сейирибиз уллуду», - дегенди ол.

Аны айтханда, регионну башчысы Киров областьда инвесторлагъа ахшы онгла болгъанын чертгенди. Ол тийреде транспорт бёлюм айныпды: ичи бла темир жолла барадыла, Победилово аэропорт жангыртылады, автотранспорт инфраструктура да асламды.

Сергей Говоров къонакъбайлыкъ этгенлери ючюн губернаторгъа сау болугъуз дегенди. Аны бла тюбеширден алгъа делегация регионда талай предприятияда болгъанын да билдиргенди. Эл мюлкде кенг хайырланылгъан минерал семиртгичле чыгъарыучу производствогъа бютюнда уллу сейир болгъанын чертгенди. «Бизде эл мюлк товарла чыгъарыучулагъа ала бла байламлыкъла къурау магъаналы боллукъду. Къабарты-Малкъарда терек бахчачылыкъ тири айный барады, алай дунияда бола баргъан ишле ишчи байламлыкъланы тюрлендирирге чакъырадыла. Киров область бийик технологиялы регион болгъанын, мында эт производство иги айныгъанын белгилерге тийишлиди. Биз а кеси жаныбыздан бери тахта кёгетле бла жемишле, дагъыда урлукъла эмда промышленность продукция келтирирге боллукъбуз», - дегенди Правительствону Председателини биринчи орунбасары.

Регионланы экиси да кемпинг эмда глэмпинг деген затланы чыгъарыуда эмда хайырланыуда бирге ишлерге боллукъдула. Аланы Киров областьда жарашдырадыла. Алай бла туризм жаны бла да байламлыкълагъа жер табыллыкъды. Бютюнда жууукъ кезиуде, Александр Соколов билдиргеннге кёре, ол областьны бла Минеральные Воды шахарны арасында тюзюнлей авиарейс ачыллыкъды.

Промышленностьда байламлыкъланы юсюнден айтханда, республиканы делегациясы областьда ол жаны бла уллу онглары болгъан Кирово-Чепецк шахаргъа да къайтхан эди. Аны башчысы Елена Савина къонакълагъа экскурсия бардыргъанды. Биринчиден. ала семиртгичле чыгъарыучу «Агрохимикат» заводха къайтхандыла. Аны продукциясына Къабарты-Малкъарда сурам боллугъуна сёз жокъду. Ызы бла делегацияны келечилери шахарны «Южный» паркына къарагъандыла. Ол тийрени тапландырыу жаны бла федерал программаланы къыйматлылыгъыны юлгюсюне санаргъа тийишлиди. Къонакъла энтта да кёп жерледе болгъандыла, кёргенлерине багъа бергендиле.

Киров областьда болгъан кезиуде республиканы келечилери къауум келишимлеге къол салгъандыла. Дагъыда Урунууну махтауу скверде саугъагъа келтирген онбеш кёк назы терекчикни орнатыугъа къатышхандыла. Александр Соколов а аланы келир жыл Киров шахарны 650 жыллыгъын белгилеу байрамгъа чакъыргъанды.